YUSUFU agambile kola yaka 17 pakumjigalila ku Eguputo. Kweleko akumsumisya kwa mundu jwine lina lyakwe Potifala. Potifala akusakamula masengo kwa mwenye jwa ku Eguputo, jwakusakolanjikwa kuti Falao.

Yusufu akukamula masengo mwakulipeleka mnope kwa abwana ŵakwe Potifala. Sambano Yusufu pakukula, Potifala akumpa ukumu wakulolela nyumba jakwe josope. Nambo ana ligongo cici Yusufu pelepa akuwoneka kuti ali m’nyumba ja ukayidi? Lili ligongo lya ŵamkwawo Potifala.

Yusufu pakukula akuŵa mundu jwakusalala, m’yoyo ŵamkwawo Potifala akusaka ali agonile najo. Nambo Yusufu akumanyilila kuti kutenda yeleyi kuli kulemwa, ni ngakusaka kutenda yeleyi. Ŵamkwawo Potifala akutumbila mnope. Ni sambano pakwika Potifala panyumbapo, ŵamkwawowo akwasalila yaunami acitiji: ‘Yusufu jwakusakala jula ŵalingaga kuti agone ni une!’ Potifala akwakulupilila ŵamkwawowo, ni akumtumbilila mnope Yusufu. M’yoyo akum’ŵika m’nyumba ja ukayidi.

Mwacitema jwakulolela nyumba ja ukayidi, akumanyilila kuti Yusufu ali mundu jwambone. Ni akumpa ukumu wakwalolela akayidi acimjakwe.Ndaŵi jine Falao ŵamtumbilile jwakupelecela finyo, soni jwakuteleka mkate, ni ŵaŵisile m’nyumba ja ukayidi. Lisiku line cilo, jemanjaji ŵasagamile sagamisi, nambo nganamanyilila kugopolela kwa sagamisi syawosyo. Kuli kucele Yusufu akwasalila kuti: ‘Asalile sagamisi syawo.’ Paŵamsalile, Yusufu ni cikamucisyo ca Mlungu akusala kugopolela kwa sagamisi syawo.

Yusufu akumsalila jwakupelecela finyo jula kuti: ‘Pambesi pa masiku gatatu cimkopoce m’nyumba ja ukayidi, ni cam’wucisye pamasengo genu gakupelecela finyo.’ Yusufu akwendelecela kuŵeceta kuti: ‘Patimcikopokapo cimwasalile Falao ya une, kuti mungamucisye kuti ngopoce une mmalo agano.’ Nambo kwa jwakuteleka mkate jula Yusufu akumsalila kuti: ‘Cipagambe kumala masiku gatatu Falao camsikite.’

Pagagambile kumala masiku gatatu yatendekwe yaŵasasile Yusufu yila. Falao ŵamsikite jwakuteleka mkate jula. Nambo jwakupelecela finyo jula, ŵamkopwesye m’nyumba ja ukayidi ni ŵatanditesoni kutumicila mwenye. Nambo jwakupelecela finyo jula ngakukumbucila ya Yusufu! Jwalakwe ngakumsalila Falao pakwamba ya Yusufu. Ni Yusufu akwendelecela kutama m’nyumba ja ukayidi.