José deguyoo
Historia 22
José deguyoo
JOSÉ napa 17 iza ora zinécabe laa Egipto. Raqué bitoocabe laabe lu ti hombre láʼ Potifar, ne hombre riʼ la? rúnibe xhiiñaʼ rey stiʼ Egipto, rey ni rábicabe Faraón.
Nadipaʼ dxiiñaʼ runi José para xpixuaanaʼ, Potifar. Ngue runi, biniisi si José la? Potifar bidii laabe gápabe guiráʼ stiʼ. Peru xiñee deguyoo José pue. Pur xheelaʼ Potifar.
Ora biniisi José gúcabe ti hombre guizáʼ galán, ngue runi xheelaʼ Potifar gucalaʼdxiʼ ñatané José laa. Peru José qué niná diʼ purtiʼ nánnabe de que malu ni. Xheelaʼ Potifar ridxiichi stálepeʼ, ngue runi ora beeda xheelabe la? rusiguiibe laa ne rábibe laa: ¡José gucalaʼdxiʼ ñatané naa! Potifar biʼniʼ cré xheelaʼ ne bidxiichinebe José ne biseguyoobe laa.
Qué nindaa diʼ, hombre ni rapa ralidxi guiibaʼ que biiyabe de que José guizáʼ nachaʼhuiʼ, ngue runi bidiibe laa gapa guiráʼ cani deguyoo que. Despué Faraón bidxiichinebe coperu ne panaderu stibe ne biseguyoobe laacaʼ. Ti gueelaʼ cada tobi de laacabe guníʼ xcaandacabe peru qué gánnacabe xi riníʼ cani. Sti dxi que na José rabi laacabe: Lagabi naa xi guníʼ xcaandatu. Ne óraque gucané Dios José para gunda bisiénebe ca bacaandaʼ que.
José gudxi coperu que: Lu chonna gubidxa zareeluʼ de raríʼ, ne zabiguetaʼ zácaluʼ coperu stiʼ Faraón. Ngue runi José rabi laabe: Ora guireeluʼ la? bizeete naa nezalú Faraón ne gucané naa guiree raríʼ. Peru panaderu que la? José rabi laa: Lu chonna gubidxa Faraón zugá yánniluʼ.
Lu chonna gubidxa que guca cásipeʼ modo guníʼ José que. Faraón rugabe yanni panaderu que, peru coperu que rundaacabe laa ne ribiguetaʼ runi xhiiñaʼ rey que. ¡Peru rusiaandabe José! Qué ruzeetedibe laa nezalú Faraón, ngue runi José gupa xidé biaana ralidxi guiibaʼ que.
