Maana 23nan

Faraon ka sugow

SAN fila tɛmɛna. Yusufu bɛ kaso la halisa. Faraon ka minnifɛndibaga kuntigi hakili bɔra Yusufu kɔ. Nka, don dɔ su fɛ, Faraon ye sugo fila kɛ, minnu tun tɛ sugo gansanw ye. A tun b’a fɛ ka o sugow kɔrɔ dɔn. I ɲɛ bɛ Faraon na sunɔgɔ la yan wa? O dugujɛ, Faraon y’a ka jamana kodɔnnaw wele, k’a ka sugow lakali u ye. Nka, u ma se ka sugow kɔrɔ fɔ a ye.

Faraon ka minnifɛndibaga kuntigi hakili jiginna sisan Yusufu la. A ko Faraon ma: ‘Ne tun bɛ kaso la tuma min na, cɛ dɔ tun bɛ yen min bɛ se ka sugow kɔrɔ fɔ.’ Faraon ye Yusufu labɔ kaso la o yɔrɔnin bɛɛ la.

Faraon y’a ka sugow lakali Yusufu ye. A ko: ‘Ne ye misi tɔlɔlen wolonwula ye minnu tun cɛ ka ɲi. O kɔfɛ, ne ye misi fasalen wolonwula ye minnu kolo dɔrɔn tun bɛ ye. Nka, misi fasalenw ye misi tɔlɔlenw dun.

‘Ne ka sugo filanan na, ne ye ɲɔtinsan wolonwula ye minnu bɔra kala kelen na. U  tun falen don kisɛ la. U tun sera fana. O kɔfɛ, ne ye tinsan wolonwula wɛrɛ ye kisɛ tɛ minnu na, ani u jalen tun don. O ɲɔtinsan kisɛntan jalen fana ye ɲɔtinsan kisɛma kunun.’

Yusufu ko Faraon ma: ‘Sugo fila ninnu kɔrɔ ye kelen ye. Misi tɔlɔlen wolonwula ani ɲɔtinsan kisɛma wolonwula kɔrɔ ye san wolonwula ye. Misi fasalen wolonwula ni ɲɔtinsan kisɛntan jalen wolonwula kɔrɔ ye san wolonwula wɛrɛw ye. San wolonwula bɛna kɛ Misira jamana na, suman caman bɛna sɔrɔ. Nka, o kɔfɛ, san wolonwula wɛrɛ bɛna kɛ, suman bɛrɛ tɛna sɔrɔ.’

O la sa, Yusufu y’a fɔ Faraon ye ko: ‘I ka cɛ hakilima dɔ ɲini min bɛna suman dalajɛ, san ɲuman wolonwula kɔnɔna na. O cogo la, san jugu wolonwula kɔnɔna na, mɔgɔw tɛna kɔngɔ dɔn.’

O hakilila diyara Faraon ye kosɛbɛ. A ye Yusufu ta walisa a ka suman dalajɛ, k’u mara mangasanw kɔnɔ. Yusufu kɛra mɔgɔba ye Misira jamana na. Ale de tun dalen bɛ Faraon kan.

San segin tɛmɛnen kɔ, kɔngɔ kɔnɔna na, Yusufu ye cɛ dɔw natɔ ye. I b’a dɔn mɔgɔ minnu tun don wa? Yusufu kɔrɔkɛ 10 tun don. U fa, Yakuba tun ye u ci ka na Misira, bawo u ka suman tun bantɔla don Kanan jamana na. Yusufu ma fili a kɔrɔkɛw ma, nka olu filila ale ma. E b’a dɔn mun na wa? Yusufu tun kɔrɔbayara. Ka fara o kan, fini suguya wɛrɛw de bɛ a kan na sisan.

Yusufu hakili jiginna a denmisɛnnama ka sugow la. O sugow la, a tun y’a ye ko a kɔrɔkɛw nana u biri ale ɲɛkɔrɔ. I hakili bɛ o la wa? Yusufu y’a faamu sisan ko Ala de y’a ci Misira, kun ɲɛnama na. E fɛ, Yusufu bɛna mun kɛ? An k’o lajɛ ɲɔgɔn fɛ.

Jenɛse 41:​1-57; 42:​1-8; 50:⁠20.