Kukwe kira 23

Faraón käkwe köböbare

KÄ NIKANI kubu ta angwane, José nämene ngite. Ni vino bianka rei ie ye ñaka niara ngwen törö jai. Yebiti deu Faraón käkwe kukwe ütiäte tuani köböre bobu, aune ñaka nükani gare ie. ¿Tä ja dükani ye tuin mäi? Jädrinaine dekä Faraón käkwe nitre töbätä käräbare aune köböbare kwe ye niebare kwe ietre. Akwa dre gäräbare ye ñaka nükani gare ietre.

Yebiti ni vino bianka rei ie yei José nükani törö. Aune niebare kwe Faraón ie: ‘Ti nämä ngite ye ngwane ni nämä iti abokän nämä köbö ye mike gare.’ Jötrö ngwarbe Faraón käkwe José mikani kwäre biti käräbare kwe.

Faraón käkwe köbö ye niebare José ie: ‘Tikwe nibi krä kükü köte aune bä nuäre turi. Bätä nibi krä kükü krä krubäte tikwe turi. Aune nibi krä ye käkwe nibi köte ye kwiti.

‘Tikwe köböni bobukäre yete triko mu dati jutuani tie abokän ngwä nibi krä kükü jabätä. Aune dati ngwä nibi krä kükü jabätä akwa nöta. Aune triko ngwä nöta ye nibi dati ngwä krä kükü kwin ye ñainkä.’

Josekwe niebare Faraón ie: ‘Köböni bobu mäkwe ye kukwe ja erebe gärätä. Nibi krä kükü köte aune triko ngwä krä kükü jabätä, ye abokän kä kwä kükü gärätä. Bätä nibi krä kükü krä aune triko ngwä krä kükü krä kia, ye abokän kä kwä kükü mada gärätä. Kä kwä kükü te mrö rabai krubäte kä Egipto känti. Yebiti kä kwä kükü te mrö nikadi krubäte.’

Ye medenbätä, José käkwe niebare Faraón ie: ‘Mäkwe ni töbätä känä iti aune kä kwä kükü te mrö rabai krubäte ye ngwane mäkwe mika mrö ükökrö. Ne kwe kä kwä kükü te mrö nikadi ye ngwane nitre ñaka krütadre mrö kisete.’

Kukwe ye namani tuin kwin Faraón ie. Aune José dianinkä kwe mrö ükakrökäre. Faraón ye bitikäre José namani bäri ütiäte kä Egipto känti.

Kä kwä kwä te mrö nika nämene ye ngwane, nitre nikani tuin José ie. ¿Nire gare mäi? ¡Ye José eteba ni jätä bäri umbre! Niaratre rün Jacob käkwe juani Egipto, ñan ñobätä aune kä Canaán känti mrö nika namani. José ie etebatre ye nükani gare akwa niaratre ie José ñaka nükaninta gare. ¿Ñobätä gare mäi? José niena umbre aune ja ngwäkitani bä jene yebätä.

José nämene chi angwane, etebatre nükani känti aune namani ngüdokwäre jutuabare köböre ie ye nükaninta törö ie. ¿Mäkwe ñäkäba kukwe yebätä ye törö mäi? Ye medenbätä Ngöbökwe etebatre ye juani Egipto nükani gare ie, aune kukwe kwinbätä. ¿Dre nuainbare Josekwe raba ruin mäi? Ani mike gare jai.

Génesis 41:1-57; 42:1-8; 50:20.