OB XYOOS tom qab ntawd, Yauxej tseem nyob hauv nkuaj. Tus uas ce cawv txiv hmab tsis nco qab txog Yauxej li lawm. Muaj ib hmos Falau ua 2 zaj npau suav uas tseem ceeb heev. Nws xav paub saib 2 zaj npau suav ntawd lub ntsiab txhais li cas. Koj puas pom nws tabtom pw tsaug zog hauv daim duab no? Thaum sawv ntxov Falau thiaj hu nws cov neeg txawj ntse tuaj thiab qhia nws 2 zaj npau suav rau lawv. Tiamsis lawv txhais tsis tau 2 zaj npau suav ntawd lub ntsiab rau nws.

Tus uas ce cawv txiv hmab txawm nco txog Yauxej. Nws hais rau Falau tias: ‘Thaum kuv nyob hauv nkuaj muaj ib tug txivneej nyob hauv uas txawj txhais npau suav.’ Tamsim ntawd Falau thiaj hais kom neeg mus coj Yauxej tawm hauv nkuaj los.

Falau qhia nws 2 zaj npau suav rau Yauxej tias: ‘Kuv pom 7 tus nyuj rog rog zoo nkauj heev. Ces kuv ho pom 7 tus nyuj yuag yuag tshuav pob txha xwb. Ces cov nyuj yuag cia li muab cov nyuj rog noj tas lawm.

‘Kuv rov qab ua ib zaj npau suav. Kuv pom ib tsob nplej muaj 7 hnab puv puv thiab siav zoo heev. Ces kuv ho pom muaj dua 7 hnab nplej qhuav qhuav. Thiab cov hnab nplej qhuav qhuav ntawd txawm muab cov hnab nplej puv puv nqos tas lawm.’

Yauxej hais rau Falau tias: ‘Ob zaj npau suav no muaj tib lub ntsiab xwb. Xya tus nyuj rog rog thiab 7 hnab nplej uas puv puv ntawd txhais tias 7 xyoo. Xya tus nyuj yuag yuag thiab 7 hnab nplej qhuav qhuav txhais tias 7 xyoo ntxiv. Yog li ntawd, 7 xyoo saum no yuav muaj qoob loo ntau heev thoob plaws Iyi tebchaws. Tiamsis 7 xyoo tom qab ntawd qoob loo yuav hlob tsis taus li.’

Yog li ntawd, Yauxej hais rau Falau tias: ‘Xaiv ib tug neeg muaj tswvyim thiab tsa nws ua tus sau qoob loo ntawm 7 lub xyoo uas zoo qoob. Ua li ntawd tibneeg thiaj yuav tsis tuag tshaib ntawm 7 lub xyoo uas tsis muaj qoob loo tuaj.’

Falau nyiam li Yauxej hais no. Nws thiaj xaiv Yauxej ua tus sau qoob loo los cia. Yauxej tau los ua ib tug neeg tseem ceeb heev hauv Iyi tebchaws. Nws tau ua tus nom uas yau Falau xwb.

Yim xyoo tom qab ntawd, thaum lub caij muaj kev tshaib kev nqhis, Yauxej pom ib co txivneej tuaj cuag nws. Koj puas paub cov txivneej ntawd yog leejtwg? Lawv twb yog Yauxej 10 tus tijlaug ntag! Lawv txiv Yakhauj hais kom lawv mus nram Iyi tebchaws rau qhov nyob hauv Khana-as tebchaws lawv cov mov yuav tas. Yauxej tseem paub nws cov tijlaug, tiamsis lawv tsis paub nws lawm. Koj puas paub yog vim li cas? Vim yog Yauxej laus zog lawm, thiab nws hnav khaubncaws txawv lawm.

Yauxej nco txog puag thaum nws tseem yau nws ua npau suav tias nws cov tijlaug tuaj pe nws. Koj puas nco txog qhov ntawd? Yog li ntawd, Yauxej thiaj paub tias yog ib qho zoo uas Vajtswv xa nws mus nyob nram Iyi tebchaws. Yauxej yuav ua li cas xwb? Cia peb mus kawm saib.