TAQSIṬ TIS 23

Tirga n Ferɛun

ƐEDDAN sin iseggasen, Yusef mazal-​it di lḥebs. Lewkil-​nni n tissit ur t-​id-​immekti ara. Yiwen yiḍ, Ferɛun yurga snat n tirga issewhamen, dɣa yebɣa ad iẓer acu i d lmeɛna-​nsent. Twalaḍ-​t dagi deg wusu-​ines? Azekka-​nni ṣṣbeḥ, Ferɛun yessawel i imusnawen-​is dɣa yeḥka-​yasen akk ayen yurga. Lameɛna ula d yiwen ur yezmir a s-​d-​yessefru tirga-​ines.

Lewkil-​nni n tissit yemmekta-​d imir Yusef. Yenna i Ferɛun: ‘Asmi i lliɣ di lḥebs yella dinna yiwen wergaz i gzemren ad issefru tirga.’ Din din Ferɛun yessufeɣ-​ed Yusef si lḥebs.

Ferɛun yeḥka i Yusef tirga-​ines. Yenna-​yas: ‘Walaɣ sebɛa n testan (tisita) cebḥent yerna ṣeḥḥant. Mbeɛd walaɣ sebɛa n testan nniḍen cemtent yerna ḍeɛfent. Tistan-​nni iḍeɛfen ččant tistan-​nni iṣeḥḥan.

‘Di targit tis snat, walaɣ sebɛa n tgedrin, cebḥent, ččuṛent, ffɣent-​ed seg yiwen yimɣi. Mbeɛd walaɣ sebɛa n tgedrin nniḍen ţ-​ţujjixin (ţ-​ţirqaqin) yerna kkawent. Tigedrin-​nni tujjixin sseblɛent tigedrin-​nni yeččuṛen.’

Yusef yenna i Ferɛun: ‘Snat n tirga-​yagi sɛant yiwet lmeɛna. Sebɛa n testan-​nni iṣeḥḥan akk-​d sebɛa n tgedrin-​nni yeččuṛen d sebɛa iseggasen. Sebɛa n testan-​nni iḍeɛfen akk-​d sebɛa n tgedrin-​nni tujjixin d sebɛa iseggasen nniḍen. A d-​ilin sebɛa iseggasen ideg ara iɛum lxiṛ di tmurt n Maṣer. Mbeɛd, a ten-​id-​tebɛen sebɛa iseggasen n laẓ.’

Yusef yenna daɣen i Ferɛun: ‘Xtiṛ argaz aɛeqli, ufhim ara d-​ijemɛen yerna ara ixeznen lqut di sebɛa iseggasen-​nni n tawant. Akkenni agdud ur iţmeţţat ara m’ara d-​asen sebɛa iseggasen-​nni n laẓ.’

Ṛṛay-​agi yeɛǧeb i Ferɛun. Dɣa yextaṛ Yusef akken ad ijmeɛ yerna ad ixzen nneɛma. Yusef yuɣal d argaz ameqran di tmurt meṛṛa n Maṣer. Ulac win yellan nnig-​es, siwa Ferɛun.

Tura ɛeddan tmanya iseggasen, aql-​aɣ di lawan-​nni n laẓ. Yusef iwala kra n yergazen i d-​iteddun. Teẓriḍ anwa-​ten? D ɛecṛa watmaten-​is! Iceggeɛ-​iten-​id baba-​tsen Yeɛqub ɣer Maṣer axaṭer ixuṣṣ lqut di tmurt n Kanɛan. Yusef yeɛqel atmaten-​is, ma d nutni ur t-ɛqilen ara. Teẓriḍ acuɣer? Axaṭer Yusef yuɣal d argaz yerna yelsa llebsa ixulfen tin n zik.

Dɣa Yusef yemmekta-​d ayen akken yurga ɣef watmaten-​is di temẓi-​s. Yurga usan-​d ad knun zdat-​es. Tecfiḍ ayen teɣriḍ ɣef wannect-​a? Yusef yefhem belli d Ṛebbi i t-​id-​iceggɛen ɣer Maṣer, yerna mačči bla ssebba. Teẓriḍ d acu ara yexdem Yusef? D ayen ara nwali tura.

Laṣel n ddunit 41:1-57; 42:1-8; 50:20.