AK WIIBʼ chihabʼ relik saʼ tzʼalam laj kʼehol ukʼaʼ ut laj Jose toj wank saʼ tzʼalam. Laj kʼehol ukʼaʼ kisach saʼ xchʼool aatinak chirix laj Jose. Laj Faraon wank wiibʼ li xmatkʼ, abʼan inkʼaʼ naxnaw xyaalal. Saʼ li eetalil nakʼutunk naq yook chi matkʼek. Naq kisaqewk laj Faraon kixtaqla xbʼoqbʼalebʼ laj qʼe ut kixye rehebʼ li xmatkʼ. Abʼan inkʼaʼ keʼxtaw xyaalal.

Tojaʼ naq laj kʼehol ukʼaʼ kixye re laj Faraon: ‹Saʼ tzʼalam wank jun li winq naxnaw xyaalal ebʼ li matkʼ›. Joʼkan naq laj Faraon kirisi laj Jose saʼ tzʼalam.

Laj Faraon kixseeraqʼi li xmatkʼ re laj Jose: ‹Kiwil wuqubʼ chi wakax chʼinaʼusebʼ ut ninqebʼ xtibʼel. Ut kiwil wuqubʼ chi wakax yiibʼebʼ ru ut bʼaqebʼ xtibʼel. Ut ebʼ li wakax, li bʼaqebʼ xtibʼel, keʼxnuqʼ li wakax li ninqebʼ xtibʼel›.

‹Saʼ xkabʼ ru linmatkʼ, kiwil saʼ jun xtoonal li triiw wank wuqubʼ chiij ru li triiw ut chaqʼalebʼ li ru. Ut kiwil saʼ jun xtoonal li triiw wank wuqubʼ chiij li triiw ut chaqihebʼ li ru. Ebʼ li chaqi triiw keʼok xnuqʼbʼal ebʼ li chaabʼil triiw›.

Laj Jose kixye re laj Faraon: ‹Juntaqʼeetebʼ xyaalal laamatkʼ. Li wuqubʼ chi chaabʼil wakax ut li wuqubʼ chi chaabʼil triiw, naraj xyeebʼal wuqubʼ chihabʼ. Li wuqubʼ chi chaqi wakax ut li wuqubʼ chi chaqi triiw, naraj xyeebʼal wuqubʼ chihabʼ chik. Joʼkan naq, chiru wuqubʼ chihabʼ twanq naabʼal li tzakahemq. Ut chiru li wuqubʼ chihabʼ chik tmaakʼaʼoq li tzakahemq›.

Joʼkan naq, laj Jose kixye re laj Faraon: ‹Sikʼ junaq winq wank xnaʼlebʼ, re naq tixchʼutubʼ li tzakahemq chiru li wuqubʼ chihabʼ naq twanq li tzakahemq. Chi joʼkan maaʼani tkamq chiruhebʼ li chihabʼ naq tmaakʼaʼoq li tzakahemq›.

Laj Faraon kiwulak chiru li kixye laj Jose. Joʼkan naq laj Faraon kixxaqabʼ laj Jose re naq aʼan tchʼutubʼanq re li tzakahemq ut tixxok. Laj Faraon kixkʼe xwankil laj Jose saʼ li tenamit Egipto.

Jun chihabʼ rokik li weʼej, naq laj Jose kiril naq yookebʼ chaq chi chalk jun chʼuut chi winq. Ma nakaanaw anihebʼ? Aʼanebʼ li 10 chi ras laj Jose. Laj Jacob kixtaqlahebʼ li ralal saʼ li tenamit Egipto xbʼaan naq saʼ li tenamit Canaan maakʼaʼ chik li tzakahemq. Laj Jose kixnawebʼ ru li ras, abʼan aʼanebʼ inkʼaʼ chik keʼxnaw ru laj Jose. Kʼaʼut naq inkʼaʼ chik keʼxnaw ru? Xbʼaan naq laj Jose moko saaj ta chik ut jalan chik naxtiqibʼ ribʼ.

Laj Jose kijultikoʼk re naq kixmatkʼe naq ebʼ li ras keʼxwiqʼibʼ ribʼ chiru. Ma jultik aawe naq ak xaatzol aʼin? Laj Jose kixkʼe reetal naq wank xyaalal naq li Yos kixkʼam chaq Egipto. Ma nakaanaw kʼaru kixbʼaanu laj Jose rikʼinebʼ li ras? Saʼ li jun chik tzolom tqatzol aʼin.