PAPICHILE myaka ibiji Yosefwa monka bamukashilatu mu kaleya. Kaseya kechi wamuvulukilemo ne. Kepo juba jimo bufuku Felo walotele biloto bibiji kabiji kechi wayukile mo byatajile ne. Nanchi wamumona awe walaala nyi? Juba jalondejilepo, Felo waichile bantu banji ba maana ne kwibabula bintu byo alotele. Bino kechi bakonsheshe kulumbulula mwatajile bino biloto ne.

Pano awa kaseya po po avulukile Yosefwa. Wamwambijile Felo amba: ‘Kimye kyo najinga mu kaleya kwajinga muntu umo wakonsheshe kulumbulula biloto.’ Ponkapotu Felo wakambizhe’mba bakamulete Yosefwa.

Felo wamubujile Yosefwa biloto byanji amba: ‘Namwene bañombe batanu na babiji babaya kabiji balamba bulongo. Kepo namwene ne bañombe bakwabo batanu na babiji banyana. Kabiji aba banyana bajilenga boba babaya.

‘Mu kiloto kyami kya bubiji namwene mitwe itanu na ibiji yatunga ne kuwama yajinga ku lunenge wa kajo. Kepo namwene lunenge mukwabo naye wajinga na mitwe itanu na ibiji yapumba. Kabiji aye mitwe itanu na ibiji yapumba yatendekele kumina yoya itanu na ibiji yatunga bulongo ne kubaya.’

Yosefwa wamwambijile Felo amba: ‘Biloto byonse bibiji byailatu mumo. Aba bañombe batanu na babiji bawama yo myaka itanu na ibiji, ne aya mitwe itanu na ibiji ya kajo yawama yo myaka itanu na ibiji. Kabiji ne aba bañombe batanu na babiji banyana, yo myaka itanu na ibiji, ne aya mitwe itanu na ibiji ya kajo kapumba yo myaka itanu na ibiji. Kukekala myaka itanu na ibiji ya kajo mu Ijipita. Kepo kukabula kajo pa myaka itanu na ibiji.’

Onkao mambo, Yosefwa wabujile Felo amba: ‘Musale mwanamulume wa maana ne kumupa mwingilo wa kukonkanya pamo kajo mu kimye kya ino myaka itanu na ibiji yawama. Byonkabyo bantu kechi bakayanda ku nzala mu myaka itanu na ibiji ikalondelapo kimye kyo kukabula kumena kajo ka kine ne.’

Felo wamutemenwe bingi uno mulanguluko. Wasajile Yosefwa kwikala wa kukonkanya kajo ne kwikasunga. Byo ajinga wa kibiji kwi Felo, Yosefwa waishile kwikala muntu wanema bingi mu Ijipita.

Pa myaka itanu na isatu yalondejilepo, mu kimye kya nzala, Yosefwa wamwene banabalume saka beya. Nanchi wibayuka bano banabalume nyi? Bajinga bakolojanji jikumi! Shabo aye Yakoba wibatumine ku Ijipita mambo ku muzhi kwabo ku Kenana kechi kwajinga kajo kawaina ne. Aye Yosefwa wibayukile bakolojanji, pano abo ne kumuyukatu ne. Nanchi wayuka kyalengejile nyi? Mambo Yosefwa pa kino kimye wakomene, kabiji wavwajile ne bivwalo byapusanako.

Yosefwa wavulukile kimye kyo akijinga kalombwana byo alotele bakolojanji saka bamufukamina panshi. Nanchi wavulukapo kutanga jino jishimikila nyi? Onkao mambo Yosefwa wayukile’mba Lesa ye wamutumine ku Ijipita kabiji pajinga ine nkebelo. Pano walanguluka’mba Yosefwa waubilepo byepi? Twaya tumone.