I DƆN pas tu ia, ɛn Josɛf stil de na jel. Di man we de gi di kiŋ tin fɔ drink, nɔ stil mɛmba bɔt Josɛf. Wan nɛt, Fɛro drim tu spɛshal drim dɛn, ɛn i bin want no wetin dɛn drim ya min. Yu de si am we i de slip? We mɔnintɛm rich, Fɛro kɔl ɔl in sɛnsman dɛn ɛn tɛl dɛn wetin i drim. Bɔt dɛn nɔ bin ebul tɛl am wetin dɛn drim ya min.

Na naw di man we de gi di kiŋ tin fɔ drink, mɛmba bɔt Josɛf. So i tɛl Fɛro se: ‘We a bin de na jel, wan man bin de de we sabi wetin drim dɛn min.’ Fɛro mek dɛn go pul Josɛf na jel wantɛm.

Fɛro tɛl Josɛf se: ‘A drim sɛvin fat kaw dɛn. Dɔn a drim sɛvin dray kaw dɛn. Ɛn di dray kaw dɛn it di fat kaw dɛn.

‘Pan mi sɛkɔn drim, a si wan plant we gɛt sɛvin big bɔnch sid dɛn. Dɔn a si ɔda wan we gɛt sɛvin smɔl smɔl bɔnch sid dɛn. Ɛn di smɔl smɔl bɔnch sid dɛn, bigin swɛla di big bɔnch sid dɛn.’

Josɛf tɛl Fɛro se: ‘Di tu drim dɛn min di sem tin. Di sɛvin fat kaw dɛn ɛn di sɛvin big bɔnch sid dɛn, min sɛvin ia. Di sɛvin dray kaw dɛn ɛn di sɛvin smɔl smɔl bɔnch sid dɛn, min ɔda sɛvin ia. Sɛvin ia de kam we plɛnti tin fɔ it go gro na Ijipt. Dɔn ɔda sɛvin ia de kam we plɛnti tin fɔ it nɔ go gro na Ijipt.’

So Josɛf tɛl Fɛro se: ‘Na fɔ pik pɔsin we gɛt sɛns, so dat we di it go de gro plɛnti, i go de gɛda dɛn ɛn kip dɛn. So angri nɔ go kil di pipul dɛn di tɛm we plɛnti tin fɔ it nɔ go de gro.’

Fɛro lɛk wetin Josɛf tɛl am. Ɛn i pik Josɛf fɔ gɛda di tin dɛn fɔ it, ɛn fɔ kip dɛn. So Josɛf bi di bigman we de afta Fɛro na Ijipt.

Di tɛm we plɛnti tin fɔ it nɔ go de dɔn bigin. Josɛf dɔn bi bigman naw fɔ et ia. Wan de, i si sɔm man dɛn de kam na Ijipt. Yu no udat na dɛn man ya? Na Josɛf in tɛn big brɔda dɛn! Dɛn papa sɛn dɛn na Ijipt bikɔs dɛn nɔ gɛt plɛnti tin fɔ it na Kenan. Josɛf no se na in brɔda dɛn, bɔt dɛn nɔ no se na in. Yu no wetin mek? Na bikɔs Josɛf dɔn tɔn big man, ɛn i bin wɛr difrɛn kayn klos.

Josɛf mɛmba di tɛm we i bin smɔl, we i drim in brɔda dɛn kam butu to am. Yu mɛmba we yu rid bɔt dat? So Josɛf no se na Gɔd sɛn am na Ijipt, ɛn nɔto fɔ bad tin mek i sɛn am de. Wetin yu tink se Josɛf go du? Lɛ wi si.