Icisimicisyo 23: Imiloto Yakwe Falo
IMYAKA ibili yapita, kabili Josefi acili mwi kati. Uwakupinte’nkomeci tamwanukilepo. Eli bumbi busiku Falo alote’miloto ibili iilibelele ukwakuti, kabili alanguluka ifi ilukwalula. Kani wamubona uyu uulele apa? Ulucelo lwakonkapo Falo aita abalalume bakwe abamano ne kubabula ifintu ifi alota. Pano bafilwa ukumubulisisya ukwalulwa kwa miloto yakwe.
Mukupelako pano eli uwakupinte’nkomeci amwanuka Josefi. Alabila kuli Falo ati: ‘Ili nali mwi kati mwali umuntu uungalabila ukwalulwa kwa miloto.’ Penka apo Falo atuma abakuleta Josefi ukufuma mwi kati.
Falo aeba Josefi imiloto yakwe: ‘Kambona iŋombe sisanu na sibili isiinine, kabili isiweme. Eli nalibwene iŋombe sisanu na sibili isyondele makosa kabili isyakubula’mafuta. Kabili iŋombe isyondele kasilya isyali isiinine.
‘Mu muloto wanji uwa bubili kambona icipakati cimo cili ne fikola fisanu na fibili ifya mpeke, ifiweme. Eli nalibwene ifikola fisanu na fibili ifyumine, ifyakubule’mpeke. Popele ifikola ifyakubule’mpeke kafitatika ukumine’fikola fisanu na fibili ifiweme, ifya mpeke.’
Josefi abula Falo ati: ‘Imiloto yonse yobilo ilukwalula cintu cimo. Iŋombe isiinine sisanu na sibili ne fikola fisanu na fibili ifya mpeke filukwalula imyaka isanu na ibili, kabili iŋombe sisanu na sibili isyondele ne fikola fisanu na fibili ifyakubule’mpeke ifyumine filukwalula imyaka naimbi isanu na ibili. Kukabe’myaka isanu na ibili ili ifyakulya ifyakuti ubwingi fikamena mu Ijipiti. Panuma yaye’yo kukabe’myaka isanu na ibili ili mukamena ifyakulya ifinini lukoso.’
Eli Josefi abula Falo ati: ‘Lomba salululeni umuntu uwa mano ne kumubika pali bucilolo bwa kubunganye’fyakulya mu myake’yo isanu na ibili iya bwingi bwa fyakulya. Eli abantu tabakafwapo ku nsala mu myaka isanu na ibili iikakonkapo ili mukamena ifyakulya finini lukoso.’
Falo alitemwe’lyo ilangulusi. Kabili asalulula Josefi ukubunganye’fyakulya ne kufilongela. Ukukonkapo pali Falo, Josefi aba muntu umucindeme makosa mu Ijipiti.
Ili papitile imyaka isanu na itatu, ninsi kuli nsala, Josefi abona abalalume’fi balukwisa. Kani ulibesi abo? Inya, bakwabo 10! Yakobi wisibo abatuma ku Ijipiti pakuti ku mupunda wabo ku Kanani ifyakulya fyaya ili fisila. Josefi abesiba abakwabo, pano bo tabamwisibilepo. Kani waisiba umulandu? Nipakuti Josefi akula kabili alifwite ifyakufwala ifipuseneko.
Josefi aanuka ukweba’ti ili aali umusankwa alilotele abakwabo balukwisa kuli ye mu kwinamisya pansi. Kani unganuka ukupendapo pali cici? Popele Josefi eli angabona ukweba’ti ni baLesa bamutuma ku Ijipiti, kabili ni pa cebo iciweme. Cindo ulukulanguluka Josefi akucita? Leka tubone.
Ifyakutaŋga 41:1-57; 42:1-8; 50:20.
Ifyakwipusya
- Mba findo fyacitikile kuli Falo bumbi busiku?
- Mba nindo uwakupinte’nkomeci amwanukila Josefi mukupelako?
- Koti nifyefyo ifilangililwe mu cikope, mba niisa yobilo imiloto Falo alota?
- Mba findo Josefi alabila ati efi imiloto ilukwalula?
- Mba Josefi aba syani umuntu umucindeme mu Ijipiti ukukonka pali Falo?
- Mba nindo abakwabo Josefi baisila ku Ijipiti, kabili nindo bafililwa ukumwisiba?
- Mba niwisa umuloto Josefi aanuka, kabili findo ifi wamofwa ukwisiba?
Ifyakwipusya na fimbi
- Pendeni Ifyakutaŋga 41:1-57.
Mba Josefi alibapele syani ubuleme baYehoba, kabili nimuli isa nsila abaKlistu muli bulelo bangatuntulula icakubwenako cakwe? (Taŋ. 41:16, 25, 28; Mat. 5:16; 1 Pet. 2:12)
Kani imyaka ya bwingi bwa fyakulya mu Ijipiti ukukonkesyapo ne myaka ya nsala ilapusanya syani imibelo ya ku mupasi iya bantu ba baYehoba muli bulelo ne yababo aba mu Klistendomu? (Taŋ. 41:29, 30; Amosi 8:11, 12)
- Pendeni Ifyakutaŋga 42:1-8 na 50:20.
Kani cibipile ku bapempesi ba baYehoba ukwinamisya pansi ku muntu ukumulemya ne kumucindika pa mulandu wa mupunda akwete kani ifyo fili mekalilo amuli cico icalo? (Taŋ. 42:6)
