ຄວາມຝັນຂອງຟາໂລ
ບົດ 23
ຄວາມຝັນຂອງຟາໂລ
ສອງປີຜ່ານໄປ ແລະໂຍເຊບຍັງຄົງຢູ່ໃນຄຸກ. ພະນັກງານນ້ຳອະງຸ່ນບໍ່ໄດ້ລະນຶກເຖິງເຂົາເລີຍ. ຄັນຄືນນຶ່ງຟາໂລໄດ້ຝັນກ່ຽວກັບເລື່ອງພິເສດສອງເລື່ອງ ແລະກະສັດກໍ່ຮູ້ສຶກສະຫງົນວ່າຄວາມຝັນນັ້ນຈະໝາຍຄວາມວ່າຢ່າງໃດ? ເຈົ້າເຫັນທ່ານພວມນອນຫຼັບຢູ່ທີ່ນັ້ນບໍ? ຕອນເຊົ້າມື້ໜ້ານັ້ນຟາໂລເອີ້ນພວກໂໜແລະໄດ້ເລົ່າຄວາມຝັນໃຫ້ເຂົາຟັງ. ແຕ່ພວກເຂົາບໍ່ສາມາດບອກຄວາມໝາຍແຫ່ງຄວາມຝັນຂອງທ່ານໄດ້.
ໃນທີ່ສຸດຕອນນີ້ພະນັກງານນ້ຳອະງຸ່ນສຳນຶກເຖິງໂຍເຊບຂຶ້ນມາໄດ້. ເຂົາຈຶ່ງຫຼອງຟາໂລວ່າ: ‘ເມື່ອຂ້າພະເຈົ້າຢູ່ໃນຄຸກ ມີຊາຍຄົນນຶ່ງທີ່ນັ້ນຜູ້ສາມາດບອກເຖິງຄວາມໝາຍແຫ່ງຄວາມຝັນໄດ້.’ ຟາໂລໄດ້ສັ່ງໃຫ້ເອົາໂຍເຊບອອກມາຈາກຄຸກທັນທີ.
ຟາໂລເລົ່າຄວາມຝັນຂອງທ່ານໃຫ້ໂຍເຊບຟັງ: ‘ເຮົາໄດ້ເຫັນງົວອ້ວນງາມໜ້າເບິ່ງ 7 ຕົວ. ຄັນແລ້ວເຮົາໄດ້ເຫັນງົວຈ່ອຍໜ້າກຽດມີແຕ່ກະດູກ 7 ຕົວ. ແລະງົວຈ່ອຍໄດ້ກິນງົວອ້ວນນັ້ນທັງໝົດ.
‘ໃນຄວາມຝັນເທື່ອທີສອງຂອງເຮົານັ້ນເຮົາໄດ້ເຫັນຮວງເຂົ້າ 7 ຮວງເປັນເມັດເຕັມງາມດີງອກຂຶ້ນມາຈາກຕົ້ນດຽວ. ແລ້ວເຮົາກໍ່ເຫັນຮວງເຂົ້າຫ່ຽວແຫ້ງລີບ 7 ຮວງ. ແລະຮວງເຂົ້າລີບນັ້ນໄດ້ກືນກິນຮວງເຂົ້າດີ 7 ຮວງ.’
ໂຍເຊບທູນຟາໂລວ່າ: ‘ຄວາມຝັນທັງສອງມີຄວາມໝາຍຢ່າງດຽວກັນ. ງົວອ້ວນເຈັດຕົວແລະຮວງເຂົ້າເມັດເຕັມເຈັດຮວງນັ້ນໝາຍເຖິງເຈັດປີ ແລະງົວຈ່ອຍເຈັດຕົວແລະຮວງເຂົ້າລີບເຈັດຮວງໝາຍເຖິງອີກເຈັດປີ. ຈະເປັນເວລາອີກເຈັດປີທີ່ຈະມີອາຫານບໍລິບູນໃນປະເທດອີຢີບ. ຄັນແລ້ວອີກເຈັດປີພາຍຫຼັງນັ້ນຈະມີການອຶດອາຫານຢ່າງໜັກ.’
ດັ່ງນັ້ນໂຍເຊບຈຶ່ງທູນຟາໂລວ່າ: ‘ຈົ່ງເລືອກເອົາຄົນທີ່ມີສະຕິປັນຍາແລະຕັ້ງໃຫ້ເຂົາດູແລຈັດການທ້ອນໂຮມອາຫານໄວ້ໃນລະຫວ່າງເຈັດປີທີ່ອຸດົມສົມບູນ. ດັ່ງນັ້ນຜູ້ຄົນຈະບໍ່ອຶດອາຫານໃນລະຫວ່າງເຈັດປີທີ່ຂາດອາຫານ.’
ຟາໂລເຫັນຊອບໃນຄວາມຄິດເຊັ່ນນັ້ນ. ແລະກະສັດໄດ້ເລືອກຕັ້ງໂຍເຊບເປັນຜູ້ລວບລວມອາຫານ ແລະເກັບໄວ້ໃນສາງ. ໂຍເຊບໄດ້ກາຍເປັນບຸກຄົນສຳຄັນທີ່ສຸດໃນອີຢີບ ຮອງຈາກຟາໂລ.
ພາຍຫຼັງແປດປີ ໃນລະຫວ່າງການອຶດອາຫານ ໂຍເຊບເຫັນຜູ້ຊາຍຫມູ່ນຶ່ງເດີນທາງມາ. ເຈົ້າຮູ້ບໍພວກເຂົາແມ່ນໃຜ? ພວກນັ້ນຄື ພວກອ້າຍ 10 ຄົນຂອງເຂົາ! ຍາໂຄບພໍ່ຂອງເຂົາສົ່ງໃຫ້ໄປອີຢີບເພາະອາຫານທີ່ບ້ານໃນແຜ່ນດິນການາອານຈວນຈະໝົດແລ້ວ. ໂຍເຊບຈື່ໜ້າພວກອ້າຍຂອງຕົນໄດ້ ແຕ່ພວກອ້າຍຈື່ເຂົາບໍ່ໄດ້. ເຈົ້າຮູ້ບໍ່ວ່າເພາະເຫດໃດ? ກໍ່ເພາະວ່າໂຍເຊບເປັນຜູ້ໃຫຍ່ແລ້ວ ແລະເຂົາໄດ້ແຕ່ງຕົວດ້ວຍເຄື່ອງນຸ່ງຫົ່ມທີ່ແຕກຕ່າງໄປ.
ໂຍເຊບສຳນຶກໄດ້ວ່າເມື່ອເຂົາເປັນເດັກຢູ່ຕົນໄດ້ຝັນເຫັນພວກອ້າຍເຂົ້າມາກົ້ມຕົວລົງໄຫວ້ຕົນ. ເຈົ້າຈື່ໄດ້ບໍ່ຕອນທີ່ອ່ານເຖິງເລື່ອງນັ້ນ. ດັ່ງນັ້ນໂຍເຊບໄດ້ເຂົ້າໃຈວ່າແມ່ນພະເຈົ້າແທ້ທີ່ໄດ້ສົ່ງເຂົາໄປອີຢີບ ແລະເພື່ອເຫດຜົນທີ່ດີ. ເຈົ້າຄິດວ່າໂຍເຊບໄດ້ເຮັດຢ່າງໃດ? ໃຫ້ເຮົາຮຽນຮູ້ຕໍ່ໄປ.
ຕົ້ນເດິມ 41:1-57; 42:1-8; 50:20.
