Chihande 23

Vilota vyaFwalo

HAHICHILE myaka yivali, Yosefwe hanga ali mukamenga. Muka-kuhana lupasa kamwanukileko. Jino ufuku umwe Fwalo himwalota vilota vyakukomwesa vivali, kaha kejivile muvinalumbunukilako. Wamumono haze nasavala? Lichako nachimene Fwalo hikusanyika vatu jenyi vaka-mangana nakuvalweza vyuma naloto. Oloze kuhasa kuvilumbununa chiku.

Muka-kuhana lupasa mwanuka jino Yosefwe. Hikulweza Fwalo ngwenyi: ‘Omu ngwapwile mukamenga mwapwile mwanalunga ahashilenga kulumbununa vilota.’ Hoho vene Fwalo himwamufumisa Yosefwe mukamenga.

Fwalo amulwezele Yosefwe vilota vyenyi ngwenyi: ‘Ngwamonanga vangombe vakununa vamwaza vatanu navavali. Jino hinangumona vangombe vakuhokama vatanu navavali. Kaha vakuhokama vaminanga vangombe vakununa.’

‘Muchilota chikwavo ngwamonanga mitwe yatiliku yitanu nayivali yakusoka kuchisachi chimwe yakuhya kanawa. Jino hinangumona mitwe yatiliku yitanu nayivali yakuminyina yakuzuza. Kaha mitwe yatiliku yakuzuza yaminanga mitwe yatiliku yamwaza yize yitanu nayivali.’

Yosefwe mwalweza Fwalo ngwenyi: ‘Vilota vivali vinalumbununa chuma chimwe kaha. Vaze vangombe vakununa vatanu navavali namitwe yatiliku yamwaza yitanu nayivali vinakulumbununa myaka yitanu nayivali, kaha vaze vangombe vakuhokama vatanu navavali namitwe yatiliku yakuzuza vinakulumbununa myaka yitanu nayivali. Nakukeza myaka yakwima kulya chakulisala chikuma yitanu nayivali muEjipitu. Jino nakukeza myaka yakwima vyakulya vyavindende chikuma.’

Yosefwe himwalweza Fwalo ngwenyi: ‘Tongola lunga wamangana nakumulingisa mwata wakutala hamulimo wakukungulula kulya mumyaka yamwaza yize yitanu nayivali. Jino vatu kaveshi kukafwa zala mumyaka yitanu nayivali nayikakavangizaho hakuhona kwima kanawa vyakulyako.’

Fwalo mwazanga vyuma vanamulweze. Kaha atongwele Yosefwe akungulule kulya, nakuchisweka. Yosefwe hakupwa muhato waFwalo, apwile jino wamulemu chikuma muEjipitu.

Hakuhita myaka yitanu nayitatu, mushimbu yazala yakalombolombo, Yosefwe mwamona malunga vali nakwiza. Unavatachikiza tahi? Eyo, vayayenyi 10! Sevo Yakova navatumu kuEjipitu hakukeha chavyakulya kwimbo lyavo kuKanane. Yosefwe navejiva vandumbwenyi, oloze vakivo chiku. Unejiva vinavahonesa kumwijiva tahi? Mwomwo Yosefwe nakolo, kaha navwale uvwalo wakulipwila.

Yosefwe himwanuka nge kuunyike alotele vandumbwenyi naveza nakufukama kuli ikiye. Nawanuka kutanga mujimbu kanou ngwetu? Yosefwe himwejiva jino ngwenyi kumana Kalunga ikiye namutumu kwiza kuEjipitu, hachuma chamwaza. Unashinganyeka ngwove Yosefwe mwalinga ngachilihi? Tuchitalenu munachipwa.

Kuputuka 41:1-57; 42:1-8; 50:20.