KUM hnih a vei a, Josefa chu tan inah a la awm reng a. Uain petu chuan amah chu a hrereng lo. Zan khat chu Pharaoan mumang danglam bik deuh mai pahnih a nei a, an awmzia a ngaihtuah a. Sawta muhil saw i hmu em? A tukah chuan Pharaoan a mifingte a ko va, mumanga a thil hmuhte chu a hrilh a. Mahse a mumang awmziate chu an hrilh thei lo.

A tawpah uain petu chuan Josefa a hre chhuak ta a. Pharaoa hnenah: ‘Tan ina ka awm lai khan chutah chuan mumang awmziate sawi theitu a awm a sin,’ a ti a. Pharaoa chuan Josefa chu tan in ata a hruaitir ta nghal a.

Pharaoa chuan Josefa chu a mumangte a hrilh a: ‘Bawngpui thau nalh tak pasarih ka hmu a. Tin bawngpui cher em em leh ruh Jang thiak mai pasarih ka hmu leh a. Tin a cherte chuan bawngpui thaute chu an ei zo ta a.

’Ka mumang pahnihnaah chuan buh kung khat atangin vui tha tak, hmin tak vui sarih ka hmu a. Tin buhvui thep deuh, ro rip riap ka hmu leh a. Tin buhvui thep deuh chuan buhvui tha pasarih chu an dawlh zo ta a,’ a ti a.

Josefa chuan Pharaoa hnenah: ‘Mumang pahnihte awmzia chu thil thuhmun a ni. Bawngpui thau pasarih leh buhvui tha, hmin tak pasarih te chu kum sarih tihna an ni a, tin bawngpui cher pasarih leh buhvui thep deuh pasarih chu kum sarih dang tihna an ni. Aigupta-ah buh tam taka neih hun kum sarih a awm ang a. Tin buh tlem tea neih hun kum sarih a awm leh ang,’ a ti a.

Chutichuan Josefa chuan Pharaoa a hrilh a: ‘Mi fing thlang la, kum tha kum sarih chhunga buh lakkhawm enkawltuah dah rawh. Tichuan a hnua buh tlem te neih hun kum tha lo kum sarih chhungin mipuiin chaw an nghei dawn lo nia,’ tiin.

Pharaoa chuan tha a ti a. Buh la khawm turin leh chhek khawm turin Josefa a thlang a. Pharaoa dawttuah, Josefa chu Aigupta-a mi pawimawh ber a ni ta a.

A hnu kum riatah, tam tlak chhungin, Josefa chuan mi thenkhat lo kal a hmu a. Tute nge an nih i hria em? E, a u 10-te kha an ni. Kanaan-a an inah chaw an neih loh vangin an pa Jakoban Aigupta-ah a tir a ni. Josefa chuan a unaute a hria a, mahse anni chuan amah chu an hre lo. A chhan i hria em? Josefa chu a upa tawh a, silhfen chi danga a inchei vang a ni.

Naupang a nih laiin a hnena kun turin a unaute an lo kal mumangah a mang tih Josefa chuan a la hrereng a. Chu thu i chhiar chu i hrereng em? Chuvangin Aigupta-a amah kaltirtu chu Pathian a niin, chhan tha tak vang a nih Josefan a hre thei a. Josefan enge tia i rin? I en ang u.