TLAPOUALISTLI 23

Ikochtemikilis Faraón

PANOA ome xiuitl, uan José ok tsaktok itech telpiloyan. Akin kimaka vino Faraón amo kilnamiki José. Ijkuakon, se yoak Faraón kipia ome kochtemikilistli tlen miak ipati, uan motlajtlania tlen kijtosneki. ¿Tikita ken kochtok? San niman ijkuak tlanesi Faraón kinnotsa akinmej ixtlamatkej uan kintlapouia tlen okochtemik. Maski ijkon, yejuan amo uelij kiluiaj tlen kijtosneki ikochtemikilis.

Axkan, tlakatl akin okimakaya vino Faraón okilnamik José. Okilui Faraón: ‘Ijkuak onitsaktoka itech tel piloyan ompa okatka se tlakatl tlen ouelitia kijtos tlen kijtosneki kochtemikilistli’. San niman Faraón otlanauati ma kikixtikan José itech telpiloyan.

Faraón okitlapoui José ikochtemikilis: ‘Onikitak chikome vacas tojtomauakej uan tlen kualtsin omoitayaj. Ijkuakon, onikinmitak chikome vacas kakalachtikej. Uan vacas kakalachtikej okinkuajkej vacas tlen okatkaj tojtomauakej.

’Itech okse nokochtemikilis onikitak chikome imiauayo trigo tlen kuali okatkaj uan omoskaltiayaj san itech se ikuajyo. Ijkuakon, onikitak chikome imiauayo trigo tlen pijpitsauakej uan uakej. Uan imiauayo trigo tlen pijpitsauakej opejkej kitoloaj chikome imiauayo trigo tlen kualtsin omoitayaj.’

José okilui Faraón: ‘Ome mokochtemikilis tlen otikitak kijtosneki san se. Chikome vacas tojtomauakej uan chikome imiauayo trigo tlen kuali okatkaj kijtosneki chikome xiuitl, uan chikome vacas kakalachtikej uan chikome imiauayo trigo tlen pijpitsauakej kijtosneki ok chikome xiuitl. Itech chikome xiuitl onkas miak tlakuali itech Egipto. Satepan, onkas chikome xiuitl ijkuak amo tlamochiuas miak’.

Ik non, José okilui Faraón: ‘Xikpejpena se tlakatl ixtlamatki uan xikilui ma tlayekana pampa ma kikololokan tlakuali itech chikome xiuitl ijkuak tlamochiuas. Ijkuakon, tlaltikpaktlakamej amo apismikiskej itech chikome xiuitl ijkuak tlasojtis tlakuali’.

Faraón okipakti tlen José okilui. Uan okipejpenki José pampa ma kikololo tlakuali, uan ma kitlati. José okipiaya miak ipati itech Egipto, maski amo ijkon ken Faraón.

Chikueyi xiuitl satepan, ijkuak okatka apistli, José okinmitak oualayaj sekimej tlakamej. ¿Tikmati akinmej? ¡Yejuan majtlaktli ikniuan tlen tlayekanaj! Intajtsin Jacob, okintitlanki Egipto pampa otlantoka intlakual itech Canaán kanin ochantiayaj. José okinmixmatki ikniuan, maski ijkon, yejuan amo okixmatkej. ¿Tikmati tleka? Pampa José yokipiaya okachi xiuitl, uan itlaken okatka tlatlamantli.

Ijkuakon, José okilnamik ken ijkuak okatka chokotsin okochtemik ikniuan omotlankuaketsayaj ixpan. ¿Tikilnamiki ken yotiktlajtolti itech nin? Ik non, José okimatki ye toTajtsin Dios akin okititlanki Egipto, pampa itlaj kuali kichiuaskia. ¿Tlen tikneltoka okichi José? Ma tikitakan.

Génesis 41:1-57; 42:1-8; 50:20.