PAPITA omanima evali, Jose ankho nkhele ukahi mokaleya. Omuavi wovinyu kahinangelele Jose. Onthiki imue kounthiki, Farao walota onondyoi onombali mbakolela unene. Iya ahande okunoñgonoka oityi onondyoi ombo mbuhangununa. Umuluete walangalapo polutalatu apa? Etyi kuatya, Farao waihana ovalume vae ovanongo, evepopila ovipuka alota. Mahi, ovanongo ovo kavetyivilile okuhangununa onondyoi mbae.

Konyima, omuavi wovinyu ahinagela Jose. Apopila Farao okuti: ‘Etyi nali mokaleya, ankho muna omulume umue utyivila okuhangununa onondyoi.’ Farao atumu okukapola Jose mokaleya.

Farao apopila Jose onondyoi mbae okuti: ‘Namona onongombe epanduvali onongwa mbanina nawa. Konyima yotyo, andyimono onongombe ononkhuavo epanduvali mbahoka unene, mbuna vala omankhipa. Iya onongombe mbokuahoka unene ambunyinipo mbokuanina.

‘Mondyoi yange yavali, namona omitwe viotiliku epanduvali viayela nawa, kehinde like vala. Konyima yotyo, andyimono vali omitwe epanduvali viotiliku viahayelele, tupu kehinde like. Iya omitwe viahayelele avinyinipo omitwe viokuayela nawa.’

Jose atolela Farao okuti: ‘Onondyoi onombali mbuhangununa vala otyipuka tyike. Onongombe epanduvali mbanina nawa, nomitwe viotiliku epanduvali viokuayela nawa, vihangununa omanima epanduvali. Iya onongombe epanduvali mbahoka unene, nomitwe viotiliku epanduvali viahayelele, tupu vihangununa omanima epanduvali. Makukakala omanima epanduvali ekuta enene mo Egitu. Konyima yotyo, makukeya omanima epanduvali ondyala onene.’

Jose apopila Farao okuti: ‘Holovona omulume umue omunongo, omuavela otyilinga tyokuongiya ovilia mokuenda kuomanima epanduvali ekuta enene. Ngotyo, ovanthu kamavankhi kondyala momanima epanduvali ondyala onene.’

Farao ahambukwa nolusoke olo. Iya aholovona Jose opo aongiye ovilia no kuvipaka momalimba. Jose alingi omunthu omunene mo Egitu.

Mokuenda kuondyala, onthiki imue Jose wamona ovalume vamue vekahi nokuiya. Utyii ovalie? Ankho ovakulu vae 10. Tate yavo Jako wevetuma ko Egitu, mokonda mo Kanaa ankho mutupu vali okulia. Jose waimbuka ovakulu vae, mahi, ovo avehemuimbuka. Utyii omokonda yatyi? Omokonda Jose wekula, tupu ankho wavala ovikutu vielikalela.

Jose wahinangela okuti etyi ankho omukuendye, walotele kombinga yovakulu vae vemutuikila konongolo. Ove utyihinangela? Ngotyo, Jose waimbuka okuti o Huku wemutumikisa ko Egitu, nehunga limue eewa. Oityi Jose alinga? Tutalei.