BI THOGI yo nje̱ya, ꞌne rä Jose mi odä ha rä fadi. Rä hñäxä binu rä Faraon nixi mi beni rä Jose. Nꞌa rä xui rä Faraon bi me̱ꞌtsi yoho yä tꞌi, ꞌne mi ñꞌani te ri bo̱ni. ¿Gi handi ge ähä? Mi hyatsꞌi, rä Faraon bä tsii nuꞌu̱ yä ꞌme̱go mñä bädi ꞌne bi xipi näꞌä xki ꞌui. Pe ninꞌa de geꞌu̱ himbi za bi xipi te ri bo̱ni nuꞌu̱ yä tꞌi.

Nubye̱, näꞌä rä hñäxä binu ja bi beni rä Jose. Bi ꞌñembäbi rä Faraon: “Nuꞌmu̱ ndi o ha rä fadi mi oni nꞌa rä ñꞌo̱ho̱ näꞌä mi pädi dä mää te ri bo̱ni yä tꞌi”. Rä Faraon bi mända nguntꞌä drä ju̱ki rä Jose de ha rä fadi.

Rä Faraon bi xipi rä Jose näꞌä xki ꞌui: “Dä ꞌui yoto yä baga xmä noho, xa xmä ñho. ꞌNepu̱ dä handi yoto yä baga xi mñä no̱xke ꞌne mñä ndoyꞌotho. ꞌNe nuꞌu̱ yä no̱xkä baga bi zi nuꞌu̱ yä baga xmä noho”.

“Ha näꞌä rä yoho rä tꞌi dä handi nꞌa ꞌmai rä trigo näꞌä xki bo̱xä yoto yä ngähä ꞌne xa xki hogi ꞌne xki ñätsꞌi. ꞌNepu̱ dä handi nꞌa ꞌmai rä trigo näꞌä xki bo̱xä yoto yä ngähä nuꞌu̱ xki ꞌmahni ꞌne xki yꞌotꞌi. ꞌNe nuꞌu̱ yä yꞌotꞌä ngähä bi zi nuꞌu̱ yoto yä ngähä xmä ñho.”

Rä Jose bi ꞌñembäbi rä Faraon: “Nuꞌu̱ yoho yä tꞌi gä ꞌui nꞌatꞌä näꞌä ri bo̱ni. Nuꞌu̱ yoto yä baga xä noho ꞌne nuꞌu̱ yoto yä ngähä xä ñho, ri bo̱ni yoto nje̱ya, ꞌne nuꞌu̱ yoto yä no̱xkä baga ꞌne nuꞌu̱ yoto yä yꞌotꞌä ngähä, ri bo̱ni mä yoto nje̱ya. Ma dä nja yoto nje̱ya habu̱ ma xa dä hogi yä ꞌmotꞌi. ꞌNepu̱ ma dä nja yoto nje̱ya habu̱ xa tsꞌu̱tho ma dä uni yä ꞌmotꞌi”.

Hänge rä Jose bi ꞌñembäbi rä Faraon: “Huahni nꞌa rä ñꞌo̱ho̱ näꞌä xa rä bämhñä ꞌne ꞌñembi dä muntsꞌi yä sofo nuꞌu̱ yoto nje̱ya ma dä uni yä ꞌmotꞌi. Pa njabu̱ yä jäꞌi hindä du rä thuhu nuꞌmu̱ xtä ꞌñepu̱ nuꞌu̱ yoto nje̱ya habu̱ xa tsꞌu̱tho ma dä uni yä ꞌmotꞌi”.

Rä Faraon bi ho näꞌä bi sipi. ꞌNe bi huahni rä Jose pa go geꞌä dä muntsꞌi yä sofo ꞌne dä me̱ꞌtsi. Mꞌe̱fa de rä Faraon, rä Jose go geꞌä mrä yoho rä ndä de ha Ejipto.

Hñäto nje̱ya mꞌe̱fa, nuꞌmu̱ bi mu̱di bi nja rä thuhu, rä Jose bi hyandi mi xä mani rꞌa yä ñꞌo̱ho̱. ¿Gi pädi toꞌoꞌu̱? ¡Geꞌu̱ nuꞌu̱ 10 yä ku mädä! Rä Jakob bi me̱hni nuyu̱ yä tꞌu̱ ha Ejipto ngeꞌä ha rä hnini Kanään bi mu̱di bi thege rä ñhuni. Rä Jose bi bädi ge mi geꞌu̱ yä ku, pe nuꞌu̱ himbi bädi ge mi geꞌä rä Jose. ¿Gi pädi por hanja? Ngeꞌä rä Jose ya mi nꞌa rä ñꞌo̱ho̱, ꞌne mi nꞌañꞌo yä hee.

Rä Jose bi beni ge nuꞌmu̱ mi bätsitho bi ꞌui ge yä ku mi ehe mi ndäne rä Jose. ¿Gi beni ge ya dä handihu̱? Hänge rä Jose pädi ge Äjuä go geꞌä bi me̱hni ha Ejipto pa nꞌa rä hogä ꞌme̱fi. ¿Te gi kamfri bi me̱fi rä Jose? Ma gä handihu̱.