TWEE Joa wieren aul vegonen un Josef wia noch emma em Jefenkjnis. De Enschenkja haud gaunz von am vejäten. Eene Nacht haud de Farao twee besondre Dreem un hee wundad, waut dee woll bedieden deeden. Kaust du dän hia seenen schlopen? Näakjsten Dach zemorjes roopt de Farao aul siene kluake Mana un vetald dee, waut am jedreemt haud. Oba kjeena kunn am sajen, waut de Dreem meenden.

Nu ieescht mol docht de Enschenkja aun Josef un säd to dän Farao: ‘Aus ekj em Jefenkjnis wia, wia doa een Maun, waut Dreem utlajen kunn.’ De Farao leet Josef fuaz oppe Städ utem Jefenkjnis holen.

Dan vetald hee Josef siene Dreem. ‘Ekj sach säwen schmocke, fate Kjieej’, säd hee. ‘Dan sach ekj säwen sea älendje Kjieej. Un de älendje freeten de fate opp.

En mienen tweeden Droom sach ekj säwen dikje, riepe Jeträajdwoppen aun eenen Staum. Dan sach ekj säwen denne un vedrieejde Woppen. Un de denne Woppen schlukten de säwen goode opp.’

Dan säd Josef to dän Farao: ‘De twee Dreem bedieden dautselwje. De säwen fate Kjieej un de säwen dikje Woppen bedieden säwen Joa. De säwen älendje Kjieej un de säwen denne Woppen bedieden nochmol säwen Joa. Doa woaren säwen goode Joaren komen met groote Arnten en Ägipten. Dan woaren doa säwen Joa komen, wua daut schia nuscht jäwen woat.’

Doawäajen säd Josef to dän Farao: ‘Wäl die eenen kluaken Maun un stal dän aun, daut dee en de säwen goode Joaren jenuach Jeträajd ensaumelt. Soo derwen de Menschen en de säwen schlajchte Joaren nich vehungren, wan doa meist nuscht waussen woat.’

Dän Farao jefoll de Iedee. Un hee wäld Josef toom daut Jeträajd ensaumlen un oppbewoaren. Josef wort de tweeda von daut väaschte en Ägipten, bloos de Farao wia hecha aus hee.

Acht Joa lota, aus de Hungaschnoot aul aunjefongen haud, sach Josef doa met eemol waut Mana aunkomen. Weetst du, wäa daut wieren? Daut wieren siene tieen elre Breeda! Äa Voda Jakob haud an no Ägipten jeschekjt, wiels see tus en Kanaan meist nuscht mea to äten hauden. Josef kjand siene Breeda, oba see kjanden am nich. Weetst du, wuarom nich? Wiels Josef wia aul ella jeworden un wia uk aundasch aunjetrocken.

Nu foll Josef daut bie, daut am aus Jung jedreemt haud, siene Breeda kjeemen un bekjten sikj ver am. Kaun die daut noch denkjen von dee Jeschicht? Nu wist Josef, daut daut Gott wia, dee am no Ägipten jeschekjt haud, wiels Gott waut em Senn haud. Waut jleefst du, waut Josef nu deed? Well wie mol seenen.