QʼAXNÄQ chi kebʼ junabʼ, ri José tzʼapal na. Ri ajqʼaxal vino xsach ri José pa ujolom. Pa jun aqʼabʼ ri Faraón kʼo kebʼ achikʼ xubʼano, tekʼuriʼ xraj xretaʼmaj su kraj kubʼij we täq achikʼ xubʼano. Chawilampeʼ pa ri wachbʼäl, ri Faraón warnäq. Chiʼ xsaqarik Faraón xeʼusikʼij ri täq ajqʼij tekʼuriʼ xubʼij chike su xrachikʼaj. Tekʼuriʼ ri täq ajqʼij xekun täj xkebʼij su xraj xubʼij ri täq achikʼ xubʼan Faraón.

Tekʼuriʼ ri ajqʼaxal vino xpe pa ujolom che José tzʼapalik. Xubʼij wariʼ che ri Faraón: ‹Chiʼ xinatzʼapij, in xinchʼobʼ uwäch jun achi che xkunik xubʼij su kraj kubʼij ri täq achikʼ xinbʼano›. Ri Faraón xutaq uresaxik lo chanim ri José pa tzʼapal wi.

Ri Faraón xubʼij che ri José su xrachikʼaj: ‹Xinwil wuqubʼ chomalaj täq wakax (bʼaka). Tekʼuriʼ xinwil wuqubʼ wakax e chkʼokʼ xuqujeʼ e bʼaq. Ri e chkʼokʼ täq wakax xketij bʼi ri e chomalaj täq wakax›.

‹Chupam ri ukabʼ achikʼ xinbʼano, xinwil wuqubʼ chomalaj täq uqʼabʼ jun raqan trigo. Tekʼuriʼ xinwil wuqubʼ e chaqiʼj täq uqʼabʼ jun raqan trigo che xeʼok che utijik bʼi ri wuqubʼ chomalaj täq uqʼabʼ wajun chik raqan trigo.›

Ri José xubʼij wariʼ che ri Faraón: ‹Ri kebʼ achikʼ xabʼano xa junam kraj kubʼij. Ri wuqubʼ chomalaj täq wakax xuqujeʼ ri wuqubʼ chomalaj täq uqʼabʼ ri raqan ri trigo are kraj kubʼij wuqubʼ junabʼ, tekʼuriʼ ri wuqubʼ wakax chkʼokʼ xuqujeʼ ri wuqubʼ chaqiʼj täq uqʼabʼ wajun raqan trigo are kraj kubʼij wuqubʼ junabʼ chik. Kpe na wuqubʼ junabʼ che sibʼalaj kʼo e kʼi su täq ktijow pa Egipto. Tekʼuriʼ kpe na wuqubʼ junabʼ che kpe jun nimalaj wiʼjal›.

Rumal laʼ, ri José xubʼij wariʼ che ri Faraón: ‹Chachaʼa jun achi nim retaʼmbʼäl tekʼuriʼ chataqa che ukʼolik ronojel su täq ktijowik pa ri utzalaj täq wuqubʼ junabʼ petinäq. Rech ri winaq kekam ta che numik pa ri wuqubʼ junabʼ chiʼ kpe ri nimalaj wiʼjal›.

Ri Faraón utz xuta wariʼ. Are xuchaʼ ri José rech kok che ukʼolik ronojel su täq ktijowik. Ri José xubʼan jun achi nim ubʼantajik pa Egipto rumal wariʼ.

Qʼaxnäq chi wajxaqibʼ (8) junabʼ, xok ri nimalaj wiʼjal, ri José xrilo che e petinäq nikʼaj achijabʼ ¿La awetaʼm e jachin täq riʼ? ¡E are ri 10 (lajuj) täq ratz ri José! Ri Jacob e utaqon bʼi pa Egipto, rumal che xkʼis ronojel su kketij pa kitinamit Canaán. Ri José xretaʼmaj kiwäch che are ri täq ratz, tekʼuriʼ ri täq ratz xketaʼmaj ta uwäch ri José. ¿Awetaʼm suche? Rumal che ri José nim chi ujunabʼ, xuqujeʼ ukojom ratzʼyaq che jun wi kkaʼyik.

Ri José sachinaq ta pa ujolom, che chiʼ jampa alaj na xrachikʼaj che ri täq rachalal xexukiʼ o xexkeʼ chuwäch. ¿La xpe pa ajolom su asikʼim chirij wariʼ? Rumal laʼ ri José xrilo che are ri Ajawaxel xutaq bʼi pa ri tinamit Egipto, xuqujeʼ Jehová retaʼm suche are utz xubʼan wariʼ. ¿La awetaʼm su xubʼan ri José? Chqilampeʼ.