YOOSEEFI usuraminku lamu diri saino. Xajje xorshannohu xaa geeshsha diqaaginosi. Mitto hashsha Feeriooni lame addi haaqe haaqiire, tiro afate quqquxami. Kuueeti goxe noota laitto? Feeriooni Layinki barra hayyoole mannasi woshshe, haaqiirinore kulinsa. Insa kayinni haaqesi tira didandiitino.

Xajje xorshanno soqqamaanchi Yooseefi qaaginohu xa hawa woteeti. Isino Feeriooni togo yii: ‘Ani usuru mine noommo waro, mittu haaqe tira dandaanno manchi no.’ Feeriooni hakkawotenni Yooseefi usuru mininni fulanno gede assi.

Feeriooni haaqesi Yooseefira kuli: ‘Lamala misashsho saa laummo. Hakkiinnino, lamala yaraddanna miqqa fulinore laummo. Qolteno, yaraddu misadda egemmitu.

‘Layinkiˈya haaqera, mitte agashsho aana gumu woˈminota lamala duuggichcho laummo. Hakkiinnino, wole agashsho aana lamala qoortinonna gumiweelo duuggichcho laummo. Qolteno qoortino duuggichcho, gumu woˈminota lamala duuggichcho egemmitu.’

Yooseefi Feeriooni togo yiisi: ‘Lamenti haaqe mittu dani tiro afidhino. Lamala misashsho saanna lamala gumu woˈmino duuggichcho, lamala dirooti. Lamala yarashsho saanna lamala qoortino duuggichchono, wole lamala dirooti. Gibitsete gobbara sagale woˈmitannohu lamalu diri daanno. Hakkunni gedensaanni kayinni, sagale ajjannohu wolu lamalu diri daanno.’

Konni daafira Yooseefi Feeriooni, ‘Sagale woˈmitannohu lamalu diri giddo sagale gamba assannoha egennaamo mancho moohisi. Hatto ikkiro sagale ajjannoha lamala diro mannu dihudiranno’ yii.

Feeriooni Yooseefi yiinota baxi. Qoleno Yooseefi sagale gamba assanno gede moohisisi. Yooseefino Gibitsete gobbara Feeriooninni aane gashshaancho ikki.

Settu diri gedensaanni hudete diri yannara, Yooseefi mannu isiwa daanna lai. Hakko manni ayeeootiro afootto? Tonne bayiruudde Yooseefi roduuwaati! Anninsa Yaaqoobi Kanaˈˈaani gobbara hude amaddeennansa Gibitse fushshe soyino. Yooseefi roduuwasi dihawino; insa kayinni habbusi. Mayira habbinosiro afootto? Korkaatuno Yooseefi lophphe jawa ikkino; qoleno baxxino uduunne uddirino.

Yooseefi wedellichchu heeˈre, roduuwisi isira sagaddanna haaqete lainoti qulli yitusi. Tenne xagge nabbawoottoti qulli yitannohe? Yooseefi, Gibitse soyinosihu Magano ikkinotanna soyinosihuno danchurira ikkinota huwati. Yooseefi assinore afootto? Hanni laˈno.