Tantara 23

Ty Nofin’i Farao

FA ROE tao zay, mbo tam-pigadrà tao avao Josefa. Tsy nahatiaro azy mpanday kôpy iny. Ndraike haly zay le nanonofy raha roe niavake Farao, ka sahìra nanontany ty vatane ie hoe, ino ty dika raha reo. Hitanao va ie miroro eto io? Nampikaike ty olo filàne torohevitse ta-Ejipta tao Farao laha fa hamaray maraindrain’iny, mba hivòla amine ty dika nofy reo, fe tsy nisy olo afake nanambara tamine ty dika raha reo.

Nahatiaro an’i Josefa ami’zay mpanday kôpy iny, ka nivòla tamin’i Farao hoe: ‘Tami’zaho nigadra iny le nisy lahilahy zay tam-pigadrà tao afake nanambara ty dika’ty nofy.’ Navototsin’i Farao baka am-pigadrà ao malaky Josefa.

Nitantara ty nofine tamin’i Josefa Farao hoe: ‘Nahita aomby vavy fito vondrake sady soa tarehy aho, noho aomby vavy fito mahia sady raty tarehy biby. Bakeo aze fito mahia reny nihina aze vondrake reo.’

‘Tami’ty nofiko faharoe le nahita vary misampa fito nitìry soa tamy tahone raike aho, masake sady vokatse soa. Bakeo nahita sampane fito hafa, maike biby aho. Nihàny aze raike raty sady maike iny laha fa bakeo, aze nitìry soa iny.’

Nivòla tamin’i Farao Josefa hoe: ‘Raike avao ty dika nofy roe reo. Aomby vavy fito vondrake noho vary masake soa misy sampane fito reny le fito tao. Aomby vavy fito mahia noho vary maike misy sampane fito reny kea le fito tao. Hahavokatse hany maro ty tany Ejipta anaty fito tao, bakeo hisy keré anaty fito tao manarake.’

Ka le hoy Josefa tamin’i Farao: ‘Mifiliàna lahilahy hendry raike iha ka volàno ie hikarakara ty famoria hany anaty fito tao. Ami’zay laha fa avy fito tao raty manarake io, le tsy himenimeny ty olo hoe tsy ampy ty hany, fa kelikele.’

Tean’i Farao hevitsin’i Josefa zay, ka nifìly an’i Josefa ie mba hangòro ty vokatse, noho hanajàry aze. Nanjary lahilahy niavake noho nalaza ta-Ejipta tao nanarakarake an’i Farao Josefa.

Valo tao tafara atoy, tamy fotoa nisia’ty mosary iny, le nahita lahilahy maromaro niavy ta-Ejipta tao Josefa. Hainao va hoe ia olo reo? Tsy ia roze io, fa rahalahin’i Josefa folo lahy reny! Nanirake an-droze hivìly hany ta-Ejipta tany Jakoba baban-droze, satria fa nanomboke lany ty hanin-droze ta-Kanana tao. Nihain’i Josefa soa rahalahine reny, fa roze tsy nahay aze mihitsy, satria fa nitombo Josefa noho tsy nanao akanjone taloha iny sasy.

Nahatiaro nofine tamin’ie mbo nikelikele iny Josefa hoe hiankohoke amine eo iaby ty rahalahine. Tiaronao va raha zay tamy iha namaky tantara io? Henany zao le nihain’i Josefa fa Andranahare ro nanirake aze ho a-Ejipta ane, sady nisy antone soa kanao ie nalefa tany. Fe hanao akore ty fihetsikin’i Josefa amy rahalahine reo? Ndao ho henteantsika.

Genesisy 41:1-57; 42:1-8; 50:20.