VILIMIKA viŵiri vikajumphapo, Yosefe wakaŵa wacali mu jere. Wakupelekera nkhombo wakamukumbuka yayi. Usiku unyake Faro wakalota maloto ghaŵiri ghapadera comene ndipo wakamanya yayi ng’anamuro lake. Kasi wamuwona wagona pasi apa? Namulenji, Faro wakacema ŵanalume ŵake ŵavinjeru na kuŵaphalira ivyo wakalota. Kweni ŵakamanya yayi ng’anamuro la maloto ghake.

Pa nyengo iyi ndipo wakupelekera nkhombo wakakumbukira Yosefe. Wakaphalira Faro kuti: ‘Apo nkhaŵa mu jere mukaŵa mwanalume munyake uyo wakumanya kupatawura ng’anamuro la maloto’. Pa nyengo yeneyiyo Faro wakacema Yosefe na kumufumyamo mu jere.

Faro wakaphalira Yosefe maloto ghake: ‘Nkhawona ng’ombe ziwemi zinkhondi na ziŵiri zakututuŵa. Pamanyuma pake nkhawona ng’ombe zinkhondi na ziŵiri zakughanda. Ndipo ng’ombe zakughanda zikarya zakututuŵa.

‘Mu loto lane laciŵiri nkhawona mphonje zinkhondi na ziŵiri za cidomba zakuca makora izo zikaŵa ku phekesi limoza. Pamanyuma pake nkhawona mphonje zinkhondi na ziŵiri za cidomba zakughanda. Ndipo mphonje zakughanda zikarya mphonje zinkhondi na ziŵiri izo zikaŵa zakuca makora.’

Yosefe wakaphalira Faro kuti: ‘Maloto ghose ghaŵiri ghakung’anamura cinthu cimoza. Ng’ombe zinkhondi na ziŵiri zakututuŵa na mphonje zinkhondi na ziŵiri za cidomba zakuca makora vikung’anamura vilimika vinkhondi na viŵiri. Kuŵenge vilimika vinkhondi na viŵiri vya vyakurya vinandi mu Eguputo. Pamanyuma pake kuŵenge vilimika vinkhondi na viŵiri vya njara.’

Cifukwa ca ici, Yosefe wakaphalira Faro kuti: ‘Penjani munthu wavinjeru na kumwimika kuti wawunjike vyakurya mukati mu vilimika vinkhondi na viŵiri vya vyakurya vinandi. Ntheura ŵanthu ŵazamufwa na njara cara mu vilimika vinkhondi na viŵiri vya njara.’

Fundo iyi yikaŵa yiwemi comene kwa Faro. Antheura wakasankha Yosefe kuti wawunjike vyakurya na kuvisunga. Pakuti wakaŵa waciŵiri kwa Faro, Yosefe wakaŵa munthu wakuzirwa comene mu Eguputo.

Vilimika vinkhondi na viŵiri vyati vyajumphapo, Yosefe wakawona ŵanalume ŵanyake ŵakwiza. Kasi mwaŵamanya? Ni ŵakuru ŵake 10! Awiskewo ŵakaŵatuma kuti ŵalute ku Eguputo cifukwa cakurya cikaŵamalira ku Kenani. Yosefe wakaŵamanya ŵakuru ŵake, kweni iwo ŵakamumanya yayi. Kasi ukumanya cifukwa cake? Nchifukwa cakuti Yosefe wakakura, ndiposo wakavwara vyakuvwara vyamtundu unyake.

Yosefe wakakumbuka kuti apo wakaŵa mwana wakalota kuti ŵabali ŵake ŵakiza kuzakamujikamira. Kasi ukukumbuka kuti ukaŵazgapo nkhani iyi? Antheura Yosefe wakawona kuti ni Ciuta uyo wakamutuma kuti wize ku Eguputo, ndipo na cifukwa ciwemi. Kasi ukughanaghana kuti Yosefe wakacitapoci? Tiye tiwone.