KʼAXIX cheb jaʼbil, te José ayto ta chukel-a. Te jkʼasesej copae maba julem ta yoʼtan te Josee. Te Faraón ay cheb swayich ta jun ajkʼabal te yanax ta aʼiyel-ae, sok la sjojkʼoybey sba te bintik swentail te swayiche. ¿Yabal awil te wayal liʼ ini? Ta yan kʼajkʼal-abi, te Faraón la stikun ta ikʼel te pʼijil winiketik yuʼune sok la yaltiklambey te bin la swayichine. Jaʼukmeto ma snaʼik yalbeyel bin swentail te swayich te Faraone.

Jich yuʼun te jkʼasesej copae jul ta yoʼtan te Josee. Jich la yalbey te Faraón: Te kʼalal ayon ta chukjibal-ae ay jtul winik te ya snaʼ yalbeyel swentail te wayichiletike. Te Faraón la stikun ta lokʼesel ta oranax ta chukjibal te Josee.

Te Faraón la scholbey yaʼiy te José te cheb swayiche, jich la yal: La kil jukeb wakaxetik te tʼujbilik sok jujpʼenik. Ta patil la kil jukeb wakaxetik te kʼax yaubenik te jaʼxanix tojol baketik, te jujpʼen wakaxetik la yichʼ bikʼel yuʼun te yauben wakaxetike.

Ta xchebal te jwayiche la kil jukchej trigo te yijubenix sok te bayal sit te yak ta chʼiel ta junax steʼele. Ta patil la kil yan jukchej trigo te jayiknax sit sok te takijemike. Te jukchej lekil trigoetik la yichʼik bikʼel yuʼun te jukchej trigo te jayiknax site.

Te José jich la yalbey te Faraone: Junax swentail te cheb wayichile. Te jukeb jujpʼen wakaxetike, sok te jukchej lekil trigoe, jukeb jaʼbil kʼoem, te jukeb yauben wakaxetik sok te jukchej trigo te jayiknax site jaʼnix jich jukeb jaʼbil kʼoem. Jukeb jaʼbil yame yakʼ bayal weʼelil ta Egipto. Ta patil jukeb jaʼbil yame yakʼ jtebnax weʼelil.

Jich yuʼun, te José la yalbey te Faraone: Tsaa jtul pʼijil winik sok akʼbeya stsob weʼelil ta jukeb jaʼbil te ya yakʼ lek weʼelile. Jichme ma xlajik ta wiʼnal-a te ants winiketik ta swenta te jukeb jaʼbil te ma xyakʼ lek weʼelile.

Te Faraón la smulan te bin albote. La stsa te José yuʼun jaʼ ya stsob te weʼelile, sok te yakuk skʼeje. Jich te José mukʼ skʼoplal kʼot ta Egipto bitʼil xchebal ajwalil ta stojol te Faraone.

Waxakeb jaʼbil ta patil, te yorailix-a te wiʼnale, te José la yil te yak ta talel chaʼoxtul winiketik. ¿Yabal anaʼ machʼatik-a? ¡Jaʼ te lajuntul sbankiltake! Te winiketik ini la yichʼik tikunel bael ta Egipto yuʼun te statik te jaʼ te Jacobe, melel yak ta lajel te sweʼelik ta banti skʼinal Canaán. Te José la snaʼbey sba stukel te sbankiltake, jaʼukmeto maba la yichʼ naʼbeyel sba stukel. ¿Yabal anaʼ bin yuʼun? Jaʼ yuʼun te ayix yaʼbilal te Josee sok slapoj kʼuʼul te yan yilel-ae.

Te José jul ta yoʼtan te kʼalal keremto-ae te la swayichin ta swenta te sbankiltak te ya xtal snijan sbaik ta stojole. ¿Yatobal anaʼ te la akʼopon ta swenta ini? Jich yuʼun te José la snaʼ te jaʼnix Dios te tikunot bael yuʼun ta Egiptoe, sok yuʼun ay lek swentail te tikunot baele. ¿Yabal anaʼ bin la spas te Josee? Yame kiltik bael.