YAKA yiŵili yimasile, Yusufu akwendelecelape kutama m’nyumba ja ukayidi. Jwakupelecela finyo nganamkumbucila Yusufu. Kaneko cilo cine Falao akusagamila sagamisi siŵili syakusosekwa mnope, nambo jwalakwe ngakumanyilila kugopolela kwakwe. Ana akum’wona Falao jwakugonajo? Kuli kucele, Falao akuŵilanga acalume ŵakwe ŵalunda nikwasalila yasagamile. Nambo jemanjaji ngakupakombola kumsalila gopolela kwa sagamisisyo.

Sambano kumbesi kwakwe jwakupelecela finyo jula akumkumbucila Yusufu. Akumsalila Falao kuti: ‘Panaliji m’nyumba ja ukayidi mwapali mundu jwine juŵapakombolaga gopolela sagamisi. Falao ndaŵi jijojo akum’ŵilasya Yusufu m’nyumba ja ukayidi.

Falao akumsalila Yusufu sagamisi syakwe kuti: ‘Nasiweni ng’ombe syasikongwe msano ni siŵili syakwimbala nambosoni syakusalala. Kaneko nasiweni ng’ombe syasikongwe sine msano ni siŵili syakunyalaya, soni syaganda mnope. Ng’ombe syaganda sila, syatandite kulya syakwimbala sila.

‘Mu sagamisi syangu syakuyicisya nagaweni masace msano ni gaŵili ga tiligu getumbuce, soni gamakomangale cenene gali pa mpesi umo. Kaneko nagaweni masace gane msano ni gaŵili ga tiligu gaganda, soni gamanyale. Sambano masace gaganda gala gatandite kumila masace msano ni gaŵili gambone gala.’

Yusufu akumsalila Falao kuti: ‘Sagamisi siŵili sya Falao kugopolela kwakwe kuli kumpepe. Ng’ombe syasikongwe syambone msano ni siŵili, soni masace gambone ga tiligu msano ni gaŵili, yili yaka msano ni yiŵili, soni ng’ombe syasikongwe msano ni siŵili syaganda ni syakunyalaya, soni masace msano ni gaŵili gangali songolo, yili yaka yinesoni msano ni yiŵili. Kuciŵa yaka msano ni yiŵili ya yagungula yejinji m’cilambo ca Eguputo. Kanekosoni kuciŵa yaka msano ni yiŵili yasala.’

Sambano Yusufu akumsalila Falao kuti: ‘Asagule mundu jwalunda kuti aloleleje masengo gakusonganganya yakulya mu yaka msano ni yiŵili yayakulya. M’yoyo ŵandu ngasawa ni sala mu yaka msano ni yiŵili ya yakulya yamnono.

Falao ŵasangalele ni nganisyosi. Sambano ŵamsagwile Yusufu kuti asonganganye yakulya ni kuyisunga. Yusufu akuŵa mundu jwakusosekwa mnope mu Eguputo, jwakuyicisya kwa Falao.

Yili yipite yaka 8, mundaŵi jasala, Yusufu akwawona ŵandu ŵane ali mkwika. Ana akumanyilila kuti ali ŵani? Ali acakulugwe 10 ŵala! Yakobo atati ŵawo ŵatumisye ku Eguputo ligongo yakulya yaliji mkwamalila kumangwawo ku Kanani. Yusufu akwamanyilila acakulugwewo, nambo jemanjajo ngakummanyilila. Ana akumanyilila ligongo lyakwe? Lili ligongo lyakuti Yusufu akusile, soni awete yakuwala ya mtundu wine.

Yusufu akukumbucila kuti paŵaliji mcanda ŵasagamile acakulugweŵa ali mkwisa nikumtindiŵalila jwalakwe. Ana akukumbucila kuti aŵalasile yeleyi? Sambano Yusufu akuyiwona kuti Mlungu ni jwamtumisye jwalakwe ku Eguputo, soni paligongo lyambone. Ana akuganisya kuti Yusufu akutenda cici sambano? Kwende tulole.