Historia 23

Ca xpacaandaʼ Faraón

GUDIʼDIʼ chupa iza, José deguyooroʼ. Coperu que la? qué guietenaláʼdxidibe José. Málasi ti gueelaʼ Faraón gupa chupa bacaandaʼ gadxepeʼ de cani huaníʼ xcaandabe, ne nuube gánnabe xi riníʼ cani. Ruuyuʼ laabe nisiaasibe racá la? Sti dxi queca Faraón bisendacaa ca hombre nuu xpiaaniʼ stiʼ, ne riníʼnebe laacaʼ xi guníʼ xcaandabe. Peru laacaʼ qué ganda diʼ gábicaʼ laabe xi riníʼ ca xpacaandabe.

Oraqueruʼ bietenalaʼdxiʼ coperu que José. Rábibe Faraón: Dxi biseguyoocabe naa que la? raqué nuu ti hombre ni randa riníʼ xi na ca bacaandaʼ ca. Oraqueca bisendacaa Faraón José de ndaaniʼ lidxi guiibaʼ que.

Faraón guniʼné José ca xpacaandaʼ: Biiyaʼ gadxe vaca guizáʼ riroo ne nabé sicarú. Óraque biiyaʼ gadxe vaca bidxi nisi dxitaládicaʼ, ne ca vaca bidxi que gudocaʼ ca vaca ngola que.

Lu guiropa bacaandaʼ stinneʼ biiyaʼ gadxe ramahuiiniʼ dxáʼtipa de biidxiʼ güi, ni caniisi lu ti nite guié si. Óraque biiyaʼ gadxe ramahuiiniʼ cá huaxiepeʼ biidxiʼ lu ne nabé nabidxi, ne ca ramahuiiniʼ cá huaxiepeʼ lu que bizulucaʼ gúbicaʼ xcadxe ramahuiiniʼ sicarú que.

José rabi Faraón: Guiropaʼ bacaandaʼ ca la? tobi si riníʼ cani. Gadxe vaca ni nabé riroo ca ne gadxe ramahuiiniʼ dxáʼtipa de biidxiʼ ca la? riníʼ ni gadxe iza, ne gadxe vaca bidxi ne gadxe ramahuiiniʼ de biidxiʼ ni nabidxi ca riníʼ ni xcadxe iza. Zeeda gadxe iza ra ziuu stálepeʼ guendaró Egipto, ne óraque zeeda xcadxe iza ra ziuu huaxiepeʼ guendaró.

Ngue runi José rabi Faraón: Biyubi tobi hombre ni nuu xpiaaniʼ ne bidii gutópabe guendaró lu gadxe iza sicarú zeeda riʼ, ne zacá binni qué zátidiʼ de guendarindaana lu xcadxe iza ra ziuu huaxiepeʼ guendaró ca.

Faraón guyuulaʼdxiʼ ni guníʼ José ca, ne gulibe José para gutopalú guendaró. José beeda gaca ti hombre jma risaca de Egipto despué de Faraón.

Xhono iza despué de ngue la? ora beeda guendarindaana que José biiyaʼ zeeda tuudxi hombre. Nannuʼ tu laacabe la? ¡Ca chii bíʼchibe ni huaniisi! Cumu maʼ cará guendaró stícabe Canaán la? Jacob bixhózecabe biseenda laacabe Egipto. José runibiáʼ ca biʼchiʼ peru laacabe que runibiáʼdicabe laabe. Nannuʼ xiñee la? Purtiʼ José maʼ huaniisi ne maʼ gadxé modo nabaʼquiʼ lari.

José bietenalaʼdxiʼ ni guníʼ xcaandaʼ dxi nahuiiniʼ, de que ca bíʼchibe zeeda gusaba íquecaʼ nezalube. Rietenalaʼdxuʼ de que maʼ biinduʼ ndiʼ la? Ngue runi José biiyaʼ de que Dios nga biseenda laabe Egipto, ne nuu xi pur. Xi raʼbuʼ runi José yaʼ. Chiguidúʼyanu.

Génesis 41:1-57; 42:1-8; 50:20.