Ododo 24

Yucepu Otemo Omegine

YUCEPU mito ngeyo ka ce omegine 10 madongo-ni pud kitgi rac dok gipe ki kica. Pi meno en owaco ni: ‘Wun lurot piny. Wun wubino me ngeyo ka ma lobowa goro iye.’

Gin guwaco ni: ‘Pe, wan pe lurot piny. Wan jo ma genne. Wan ducu wabedo omego. Onongo watye wan 12. Ento ominwa acel dong pe, dok ominwa matidine loyo tye paco bot wonwa.’

Yucepu otimme calo pe tye ka ye lokgi. En ogwoko omego ma nyinge Cimeon i mabuc, ci oweko jo mukene-ni gudok gutero cam paco. Ento owacigi ni: ‘Ka wudwogo cen, omyero obin kacel ki ominwu matidi-ni.’

I kare ma gudok cen paco i Kanaan, omego-ni gutito jami ducu ma otimme bot won-gi Yakobo. Cwiny Yakobo ocwer tutwal. En okok ni: ‘Yucepu dong pe, man dok Cimeon bene pe. Pe abiye ni wute Benjamin woda matidi loyo-ni.’ Ento i kare ma camgi dok cok tum, Yakobo oye ni gute Benjamin i Ejipt wek ginong cam mukene.

Yucepu neno ka omegine gibino. En cwinye yom tutwal me neno Benjamin omine matidi. Ngene ni, gin ducu pe onongo gingeyo ni dano man madit-ti obedo Yucepu. Yucepu dong otimo gin mo me temo lutino 10 pa nyek minne-ni.

En omiyo luticce gupiko cam i kicaagi ducu. Ento ma gin pe gingeyo, en bene oweko kiketo kikopone me ryal i kicaa pa Benjamin. I kare ma gin ducu dong gua ci guwoto manok i gudo, Yucepu ocwalo luticce i korgi. I kare ma gunongogi i yo, luticce guwaco ni: ‘Wukwalo kikopo ryal pa laditwa pingo?’

Omego-ni ducu gugamo ni: ‘Wan pe wakwalo kikopone. Ka wunongo kikopo-ni bot ngat mo i kinwa, ngat meno omyero kinek woko.’

Pi meno lutic-ci guyenyo kikopo-ni i kicaa ducu, ci gunongo i kicaa pa Benjamin, kit ma itye ka neno kwede kany-nyi. Lutic-ci guwaco ni: ‘Wun jo mukene-ni dong wutwero wot, ento Benjamin omyero odok kwedwa.’ Lutino 10 pa nyek minne-ni kombeddi dong gibitimo ngo?

Gin ducu gudok kacel ki Benjamin i ot pa Yucepu. Yucepu owaco botgi ni: ‘Wun ducu wutwero cito paco, ento Benjamin omyero odong kany calo opiina.’

Juda dong oloko woko, kun waco ni: ‘Ka adok paco labongo latin awobi-ni, wora obito woko pien en mare tutwal. Pi meno tim ber, gwok an kany calo opiini, ento wek awobi-ni ocit paco.’

Yucepu oneno ni omegine dong kitgi olokke woko. Kitgi dong pe rac dok kica bene dong makogi. Kong wanenu gin ma Yucepu timo kombeddi.

Acakki 42:9-38; 43:1-34; 44:1-34.