YOSEF ngɛ hlae nɛ́ e le keji kaa e nyɛmimɛ 10 amɛ tsake a yi mi wami su ɔ loo a tsakee we. Lɔɔ he ɔ, e de mɛ ke: ‘Slaali ji nyɛ. Nyɛ ba nɛ́ nyɛ ba kpa wa ma a si.’

A he nɔ ke: ‘Dɛbi, pi slaali ji wɔ. Anɔkualetsɛmɛ ji wɔ. Nɛ wɔ tsuo wa ji nyɛmimɛ. Jinɛ wɔ ni 12 nɛ a fɔ. Se wa kpɛti nɔ kake be je mi, nɛ wa senɔ wayoo ɔ ngɛ wa tsɛ ngɔ ngɛ we mi.’

Yosef pee kaa nɔ́ nɛ e he we mɛ yi. E ngɔ Simeon kɛ wo tsu mi, nɛ e ha e nyɛmimɛ nɛ piɛ ɔ ngɔ niye ní, nɛ a kpale kɛ ho a ma mi ya. Se e de mɛ ke: ‘Ke nyɛ kpale kɛ ma ekohu ɔ, nyɛɛ ngɔ nyɛ senɔ wayoo ɔ kɛ piɛɛ nyɛ he kɛ ba.’

Benɛ Yosef nyɛmimɛ ɔmɛ kpale kɛ ho Kanaan ya a, a ya bɔ a tsɛ Yakob nɔ́ tsuaa nɔ́ nɛ ya nɔ. Yakob ye aywilɛho. Nɛ e fo ya nɛ e de ke: ‘Yosef gbo, nɛ amlɔ nɛ ɔ Simeon hu be. I be hae nɛ nyɛɛ ngɔ ye binakutso Benyamin kɛ ho.’ Se benɛ a niye ní ɔ bɔni tami ɔ, Yakob ngmɛ blɔ nɛ a ngɔ Benyamin kɛ ho Mizraim ya bɔnɛ pee nɛ a ya ná niye ní kɛ ba we mi ekohu.

Yosef na e nyɛmimɛ ɔmɛ nɛ a ma ngɛ blɔ nɔ. E bua jɔ wawɛɛ kaa e na e senɔ Benyamin ekohu. Niinɛ, Yosef nyɛmimɛ ɔmɛ a ti nɔ ko nɔ ko li kaa nɔmlɔ ngua nɛ ɔ ji Yosef. Jehanɛ se ɔ, Yosef pee nɔ́ ko kɛ ka e nyɛmimɛ 10 amɛ kaa a tsake lo.

Yosef ha e tsɔli ɔmɛ wo a kotoku ɔmɛ a mi niye ní fuu. Nɛ e ha a ngɔ e sika hiɔ kplu fini ɔ hu kɛ wo Benyamin kotoku ɔ mi benɛ a li he nɔ́ ko. Benɛ a je ma a mi kɛ yaa saii ɔ, Yosef tsɔ e sɔmɔli ɔmɛ kɛ nyɛɛ a se. Benɛ a ya ná mɛ ɔ, sɔmɔli ɔmɛ bi mɛ ke: ‘Mɛni heje nyɛ ju wa nyɔmtsɛ ɔ sika hiɔ kplu ɔ?’

Nyɛmimɛ ɔmɛ tsuo ha heto ke: ‘Wa jui nyɛ nyɔmtsɛ ɔ kplu ko. Ke nyɛ na kplu ɔ ngɛ wa kpɛti nɔ ko kototu mi ɔ, nyɛɛ gbe jamɛatsɛ ɔ.’

Lɔɔ he ɔ, tsɔli ɔmɛ gbɛ a kotoku ɔmɛ tsuo mi, nɛ nyagbe ɔ, a na kplu ɔ ngɛ Benyamin kotoku ɔ mi, kaa bɔnɛ o ngɛ hyɛe ngɛ foni ɔ mi ɔ. Tsɔli ɔmɛ de mɛ ke: ‘Nyɛ ni fã amɛ nyɛɛ ya, se Benyamin lɛɛ e kɛ wɔ maa kpale kɛ ho.’ Kɛ nyɛmimɛ 10 amɛ maa pee kɛɛ?

Mɛ tsuo a kɛ Benyamin kpale kɛ ho Yosef we ɔ mi ya. Yosef de e nyɛmimɛ ɔmɛ ke: ‘Nyɛ tsuo nyɛɛ kpale kɛ ho nyɛ ma mi ya, se Benyamin lɛɛ e maa hi hiɛ ɔ kaa ye nyɔguɛ.’

Yuda tu munyu nɛ e de ke: ‘Ke i kpale kɛ ho we mi ya nɛ jokuɛ ɔ piɛɛ we he ɔ, ye tsaatsɛ ma gbo, ejakaa e suɔ lɛ saminya. Lɔɔ he ɔ, i kpa mo pɛɛ, ngɔɔ imi mohu kɛ pee o nyɔguɛ, konɛ o ha jokuɛ ɔ nɛ kpale kɛ ho we mi ya.’

Yosef yo kaa e nyɛmimɛ ɔmɛ tsake. A pi yi kpɛti wali hu. Jehanɛ ɔ, ha nɛ waa hyɛ nɔ́ nɛ Yosef pee.