GUSTONG maaraman ni Jose kun pasaway pa asin maurihon an sampulong mga tugang niya. Kaya sinabi niya sainda: ‘Mga espiya kamo ano? Nagdigdi kamo ’nganing aramon an kaluyahan kan kahadian mi.’

‘Dai po,’ an sabi ninda. ‘Maray kaming tawo. Magturugang po kami. Dose po kami dati. Mayo na su saro, tapos su kangudhan kaiba kan tatay mi sa harong.’

Si Jose nagsagin dai naniniwala sainda. Ipinapreso niya an tugang niyang si Simeon, tapos tinugutan an iba na magkua nin pagkakan asin mag-uli. Pero sinabihan niya sinda: ‘Pagbalik nindo digdi, siguraduhon nindong kaiba an kangudhan nindo.’

Pagkauli ninda sa Canaan, inistorya ninda ki Jacob an nangyari. Munduon si Jacob. ‘Mayo na si Jose, tapos mayo na man si Simeon. Dai ko papaibanon saindo an kangudhan kong si Benjamin.’ Pero kan paubos na su pagkakan ninda, napiritan si Jacob na paibanon si Benjamin pa-Ehipto.

Nahiling ni Jose na nagdadangadang an mga tugang niya. Ugmahon siyang mahiling si Benjamin. Siyempre, dai ninda namidbid si Jose. Pigpurbaran ngunyan ni Jose an sampulong tugang niya.

Sinabihan niya an mga suruguon niya na panuon nin kakanon an mga sako ninda. Pero dai sindang kaaram-aram, ipinalaag niya su saiyang espesyal na kopang plata * sa sako ni Benjamin. Dai pa sinda nakakarayo pagkahali ninda, ipinalapag sinda ni Jose. Kan abutan sinda, sinabi kan mga suruguon: ‘Ta’no ta hinabon nindo su kopang plata kan kagurangnan mi?’

‘Dai mi man po pighabon an kopa niya,’ an simbag kan magturugang. ‘Kun si’say man samo an makuanan nindo kaiyan, ipagadan nindo siya.’

Kaya hinalungkat kan mga suruguon an gabos na sako, tapos nakua su kopa sa sako ni Benjamin, siring kan nahihiling mo. Sinabi kan mga suruguon: ‘Makakauli na kamo pero iiiba mi si Benjamin.’ Ano na an gigibuhon kan magturugang?

Gabos sinda nagbalik sa harong ni Jose kaiba si Benjamin. Sinabi ni Jose: ‘Makakauli na kamo pero mawawalat si Benjamin para magin uripon ko.’

Sinabi ni Juda: ‘Kun mauli ako na dai kaiba si nono, magagadan an sakuyang ama dahil padabaon niya siya. Nakikiulay po ako, ako na lang an mapawalat bilang uripon mo, paulion mo lang siya.’

Nahiling ni Jose na nagbago na an mga tugang niya. Bako na sindang pasaway asin maurihon. Aramon ta kun anong gigibuhon ni Jose.