Maana 24nan

Yusufu y’a balimakɛw kɔrɔbɔ

YUSUFU tun b’a fɛ k’a dɔn ni a kɔrɔkɛ 10 tun ka jugu ani ni u tun bɛ ko kunntan kɛ halisa. O la sa, a ko u ma: ‘Aw cira ka na yɔrɔw de jateminɛ. An ka jamana barika ka dɔgɔ yɔrɔ minnu na, aw nana olu de lajɛ.’

U ko: ‘Ayi. An ma na o la. An ye mɔgɔ tilennenw de ye. An bɛɛ ye balimaw ye. An mɔgɔ 12 tun don. Nka, kelen tɛ yen tun. An bɛɛ la dɔgɔmannin bɛ an fa kɔrɔ so.’

Yusufu y’a kɛ i n’a fɔ a dalen tɛ u la. A balimakɛ min tɔgɔ ye ko Simeɔn, a ye o bila kaso la. A y’a to tɔw ka suman ta, ka taa u ka so,  Kanan jamana na. Nka, sani a balimakɛw tun ka taa, Yusufu y’a fɔ u ye ko: ‘Aw segintɔ ka na ni aw bɛɛ la dɔgɔmannin ye aw fɛ.’

U seginna tuma min na Kanan jamana na, ko minnu kɛra Misira jamana na, Yusufu kɔrɔkɛw ye olu bɛɛ fɔ u fa Yakuba ye. Yakuba ɲɛsisira kosɛbɛ. A kulela ko: ‘Yusufu tɛ yen tun, sisan fana Simeɔn tɛ yen. Ne tɛna a to aw ka taa ni ne ka lagare Benjamɛn ye.’ Nka, u ka suman bɛ ɲini ka ban tuma min na, Yakuba wajibiyara k’a to u ni Benjamɛn ka taa ɲɔgɔn fɛ Misira, walisa u ka se ka suman sɔrɔ.

Yusufu ye a balimakɛw natɔ ye tuma min na, ka a dɔgɔkɛ Benjamɛn ye, a nisɔndiyara kosɛbɛ. A balimakɛw si m’a dɔn ko u bɛ mɔgɔba min ɲɛkɔrɔ, o ye Yusufu de ye. Yusufu bɛna ko dɔ kɛ sisan walisa k’a balimakɛ 10 kɔrɔbɔ.

Yusufu y’a ka baaradenw bila ka u bɛɛ ka bɔrɛw fa ni suman ye. Nka, a ye a yɛrɛ ka warijɛ jifilen bila Benjamɛn ka bɔrɛ kɔnɔ, a balimakɛw ɲinɛ ma. U bɔra ka taa tuma min na, a ma mɛn, Yusufu ye a ka baaradenw bila ka taa u nɔfɛ. Baaradenw kunna u la tuma min na, u ko: ‘Mun na aw ye an makɛ ka warijɛ jifilen sonya?’

U bɛɛ ko: ‘An ma a ka jifilen sonya. Ni a yera mɔgɔ min kun, o tigi ka faga.’

O la sa, baaradenw ye ɲinini daminɛ bɔrɛ kelen-kelen bɛɛ kɔnɔ. U ye jifilen sɔrɔ Benjamɛn ka bɔrɛ kɔnɔ, i ko i ɲɛ b’a la cogo min na. Baaradenw ko: ‘Aw tɔw bɛ se ka taa, nka Benjamɛn ka kan ka na an fɛ.’ Balimakɛ 10 tun bɛna mun kɛ sisan?

U bɛɛ ni Benjamɛn seginna ɲɔgɔn fɛ Yusufu ka so. Yusufu y’a fɔ a balimakɛw ye ko: ‘Aw bɛɛ bɛ se ka taa so. Nka, Benjamɛn ka kan ka to yan, ka kɛ ne ka jɔn ye.’

Juda ye kuma ta sisan. A ko: ‘Ni ne seginna so k’a sɔrɔ ne ni cɛnin tɛ ɲɔgɔn fɛ, ne fa na sa, bawo a bɛ cɛnin kanu kosɛbɛ. O la sa, ne b’i deli, i ka ne mara yan, ka ne kɛ i ka jɔn ye, nka cɛnin to a ka segin so.’

Yusufu y’a ye ko a balimakɛw jogo yɛlɛmana. U tɛ ko kunntan kɛ tun, u man jugu tun. An k’a lajɛ a bɛna min kɛ sisan.

Jenɛse 42:​9-38; 43:​1-34; 44:​1-34.