YOSEFWE te kanazange kunyingika nyi 10 lia mandumbu jenyi a makulwana nihindu achili akalu hanji api. Kashika iye yamba ngwenyi: ‘Yenwe nuli ngendeshi. Yenwe nuneza nikutala ulelu wa chifuchi chetu.’

Ayo yakumbulula ngwo, ‘Ka, hi tuli ngendeshi ko. Yetwe tuli malunga angunu. Yetwe eswe tuli mandumbu. Yetwe twapwile 12. Alioze ndumbu mukwo katwamineko nawa, haliapwila wa kanuke kasala ni tata ku zuwo.’

Yosefwe yapwa ngwe te kasokutayiza. Iye yasa ndumbwenyi Simeone mu zuwo lia ususu, nawa yecha akwo hanga atwale kulia ku zuwo lio. Alioze iye yamba ngwenyi: ‘Muze yenwe munukafuna kuno ndo nukeze ni mwana-kwenu wa kanuke.’

Muze mandumbu jenyi afunyine ku zuwo lio ku Kanana, ayo yalumbununa kuli tato Yakomba yuma yeswe yize yapwile ko. Yakomba yevwa yinyengo yinji. Iye yalinyenga ngwenyi, ‘Yosefwe katwamineko, haliapwila ni Simeone neye keshiko. Chichi kwecha hanga numbate mwanami wa kasulasongo Mbenjamine.’ Alioze muze kulia yichihwa, Yakomba yecha Mbenjamine aye nenyi mu Engitu hanga anehe kulia.

Yosefwe yamona mandumbu jenyi kaneza. Iye yevwa chiseke chinji ha kumona mwana-kwo Mbenjamine. Mba alioze, niumwe wa kuli ayo te unanyingika ngwo lunga au mulemu te Yosefwe wakwihi. Yosefwe yalinga chimwe chuma hanga eseke 10 lia mandumbu jenyi.

Iye yatuma tuvumbi twenyi hanga azalise njeke jo ni kulia. Alioze kutenga iye yatuma nawa kusa umwe musenge wenyi upema wa prata mu njeke ya Mbenjamine. Muze ayo eswe te haya, nawa te hapwa kusuku mu jila, Yosefwe yatuma tuvumbi twenyi hanga aakaule mu nyima lio. Muze haawana, tuvumbi yamba ngwo: ‘Mumu liaka yenwe nweya musenge wa prata wa mwata wetu?’

Ayo yakumbulula ngwo, ‘Yetwe kutweyile musenge wa mwata wenu. Nyi nwawana musenge mu njeke ya umwe wa kuli yetwe, munuhasa kumushaha.’

Tuvumbi a Yosefwe yafupa mu njeke jeswe, hi ayo mba yawana musenge mu njeke ya Mbenjamine, ngwe chize unamona ha chizulie chino. Tuvumbi yamba ngwo: ‘Yenwe eswe munuhasa kuya, alioze Mbanjamine chatamba kufuna ni yetwe.’ Mba yika 10 lia mandumbu malinga haliapwila?

Ayo eswe yafuna ni Mbejamine ku zuwo lia Yosefwe. Yosefwe yamba kuli mandumbu jenyi ngwenyi: ‘Yenwe eswe munuhasa kuya kwenu ku zuwo, alioze Mbenjamine ndo asale kuno ngwe kapinji kami.’

Hohene Yunda yamba ngwenyi: ‘Yami nyi nafunyine ku zuwo ni mukweze yono, tata kumafwa mumu iye kakumuzanga chinji. Ngunaliumbu chinji kuli yenwe, echenu yami hanga ngupwe kapinji kenu, alioze echenu mukweze afune kama ku zuwo.’

Yosefwe yahasa kumona ngwo mandumbu jenyi te hanalumuka. Ayo kumana te haneche upi ni ukalu. Tukaulenu yize iye malinga haliapwila.