JOSÉ wisgubie e iamar 10 mergued bur anba dule isganamardibeye, degine, anba ibigwensur dulemar imagmarbardibeye. Degsoggu, aamarga soge: ‘Bemar yamo negargamaladid. Bemar yamo danimala amigega bia anmar neggweburgi ibgwensur dogledibe’.

Abinsogmala: ‘Suli, anmar aa dulemar suli, anmar dulemar emar yardagged suli. Bela anmar na gwenadganbii. Anmar 12 merguena. Auggine, anmar gwenad wargwendi bar anmar waliggudi suli, geb bur bibbigwaddi neggi besa anmar bab walig’.

José yamo iddosuliyob na imagge. Imasa wemar gwenad Simeónye nugadi esgaryagi melleged, geb bamaladdi mas sedmalad, geb na negse namalad. Auggine, emarga soge: ‘Bemar arbalile, anga bemar urba bibbigwad sedamalo’.

E neg owarmasmargua Canaánse, bela e bab Jacobga sogsamala igi gusmala. Jacob nue wileiddoge. Geb goddesunna: ‘José bar anmar waliggudi suli, geb emisgi Simeón bar anmar waliggudisurmoga. An imaggosuli bemar ani Benjamín sedmalad, an massi bibbigwad’. Auggine, ega mas galaggudgua, Jacob Benjamín barmie dagleali Egiptose, nabbi mas amigega.

Emisgi José daggarbali e gwenadgan danibali. Yeeriddoali e urba Benjamín daggargu. Auggine, emardi wissurmala we dule nugnigga gudiidi, José. José emisgindi ibmar soggwen imasa e iamar 10 mergued wilubdaggega.

E maigan gumaladi bela wemar sagumar yaba mas oubomaladga imasa. Auggine, imasbali e maigan arbagge e mani sibu nog bur nuedi Benjamín sagu yaba odogedi. Degine, bela nadmalad sorbali, geb bannaba gusmargua, José e maigan barmisa wemar baleginnega. Balegidsamargu, José e maigana wemarga soge: ‘¿Ibigala bemar anmar dummad e nog mani sibu sobaled addursasmala?’.

Bela e gwendgan sogdemala: ‘Anmar ei nog addursassuli. Doa sagu yagi sii bemar daggarmardibe, bemar we dule oburgwemalodo’.

Degsoggu, José maigan bela emar saguyab amismala, geb Benjamín saguyab e nog sii dagleali, igi sobarnaidgi be dage. José maigan soggarmala: ‘Bamaladdi namalo, auggine, Benjamíndi anmarba dago’. E iamar 10 mergumaladi, ¿ibu emisgindi imagmarsunnoe?

Ber gannar José negse, Benjamínba armarmoga. José, e gwenadganga soge: ‘Bemar bela nabir negse namala, ar Benjamíndi an waliggi melledoe an maiga guega’.

Emisgi Judá sunmaggali, geb soge: ‘An weba, massigwa sadde owarmassundibe, an bab burgoe, ar belabela na we massigwa sabgued. Degsoggu, bur be, an be an obege be maiga guega, massigwadi barmide’.

José emisgi magdagge e gwenadgan e daed gwagsamala. Bar dule isgana surmala geb bar ibigwensur dulemar imagsurmar bali. Anmar daggoena emisgi José ibu imasa.