LUYAG mahibal-an ni Jose kon ang iya 10 ka utod mapintas gihapon kag walay kaluoy. Gani nagsiling sia: ‘Mga espiya kamo.’

‘Indi kami mga espiya,’ siling nila. ‘Bunayag kami nga mga tao. Mag-ulotod kami tanan. 12 kami. Wala na ang isa, kag ang kamanghuran didto sa balay upod sa amon amay.’

Si Jose nagpakunokuno nga wala nagpati. Ginpabilanggu niya ang utod nga si Simeon, kag ginpakuha ang iban sing pagkaon kag ginpapauli. Apang nagsiling sia sa ila: ‘Kon magbalik kamo, paupda ang inyo kamanghuran nga utod.’

Sang pagpauli nila sa Canaan, ginsugid sang mag-ulotod sa ila amay nga si Jacob ang natabu. Masubo gid si Jacob. Indi niya luyag pagpaupdon si Benjamin pa Egipto. Apang sang maubos na ang ila pagkaon, ginpaupod ni Jacob si Benjamin pa Egipto agod nga makakuha sila sing dugang pa nga pagkaon.

Sang makita ni Jose nga nagapakari ang iya mga utod, nalipay gid sia nga makita ang iya manghud nga si Benjamin. Sa pagkamatuod, wala sing nakahibalo sa ila nga ining importante nga tao amo si Jose. May ginhimu karon si Jose agod tilawan ang iya mga utod sa amay.

Ginpapuno niya sa iya mga alagad ang ila mga sulodlan sing pagkaon. Apang lipod sa ila, ginbutang man niya ang iya pinasahi pilak nga tagayan sa sulodlan ni Benjamin. Sang makahalin na sila kag malayo-layo na, ginpalagas ni Jose ang iya mga alagad.

Sang maabtan nila sila, gin-usisa sang mga alagad ang tanan nga sulodlan kag nakita nila ang tagayan sa sulodlan ni Benjamin. Daw subong bala nga ginkawat ni Benjamin ang tagayan! Ang mga alagad nagsiling: ‘Tanan kamo makalakat. Si Benjamin dapat mag-upod sa amon.’ Ano ang himuon sang 10 ka utod sa amay?

Nagbalik sila tanan kay Jose nga upod si Benjamin. Si Jose nagsiling: ‘Kamo tanan makapauli. Apang si Benjamin dapat magpabilin bilang ulipon ko.’

Si Juda nagsiling karon: ‘Palihug, ako na lang ang ulipona, apang papaulia ang bata nga lalaki.’

Nakita ni Jose nga nagbag-o na ang iya mga utod. Indi na sila mapintas kag walay kaluoy. Tan-awon ta kon ano karon ang ginhimu ni Jose.