Josef ma roro omarumbi we
EHUNGI 24
Josef ma roro omarumbi we
JOSEF aa vanga okutjiwa kutja omarumbi we 10 ngundee ovavi novindandi. Okutja eye arire tja tja: ‘Oweṋe ozohoze, nu mwe ya okutjiwa ehi retu pu ri ri epupu.’
Owo arire tji va tja: ‘Kako, eṱe oweṱe ovandu ovaṱakame. Eṱe atuhe oweṱe ovanatje vaihe imwe. Eṱe twa ri 12. Nungwari umwe wa ṱa, nu omuangu wetu u ri konganda pu na tate.’
Josef wa tjita aayo ke nakukambura mu wo. Eye wa ṱizira erumbi re wena Simeon mondeko, nu imba ovarwe we vesa ve tware ovikurya konganda. Nungwari arire tja tja ku wo: ‘Tji mamu kotoka eterereye omuangu weṋu.’
Indu tjiva yaruka ku Kanaan, va karaera ihe yawo Jakob avihe mbya tjitwa. Jakob arire tja kurungisiwa tjinene. Eye wa rira na tja: ‘Josef ke po, nu nai Simeon ke po. Hi nakumuyandjera okutwara ongero yandje Benjamin.’ Nu indu ovikurya tji vya uta okuyanda, Jakob we ve yandjera okutwara Benjamin koEngipte kutja ve kaete ovikurya vyarwe wina.
Okutja Josef arire tja munu omarumbi we tji mave ya. Eye wa nyanda omutima tjinene tja muna omuangu we Benjamin. Nungwari kape na umwe wawo ngwaa tjiwa kutja omurumendu omunanḓengu ngwi oJosef. Okuzambo Josef wa tjita otjiṋa okurora natjo omarumbi we 10.
Eye wa raera ovakarere kutja ngave urise ozondjaṱu zawo novikurya. Nu nokuhina okuvetjivisa arire tja twaamisa ekopi re rapeke rosilveri mondjaṱu yaBenjamin. Indu tji va za nokuzapo ava kayenda okamukato okaṱiṱi mondjira, Josef wa hinda ovakarere ve ve ve tezere. Tji va vaza pu wo, ovakarere ave tja: ‘Omena ratjike tji mwa vaka ekopi rosilveri romuhona wetu?’
Owo avehe va tja: ‘Eṱe katu ya vaka ekopi re. Tji mwa vaza ekopi na umwe wetu, ingo nga ṱe.’
Okutja ovakarere va paha mozondjaṱu zawo, nave vaza ekopi mondjaṱu yaBenjamin, otja tji mo munu mba. Ovakarere ave tja: ‘Eṋe imbo ovarwe twendeye nungwari Benjamin ma sokuya pu na eṱe.’ Omarumbi waJosef inga 10 va tjita tjike?
Owo avehe va yaruka puna Benjamin kondjuwo yaJosef. Josef wa raera omarumbi we: ‘Eṋe amuhe twendeye konganda, nungwari Benjamin nga kare mba otja omukarere wandje.’
Juda arire tja tja: ‘Ami tji mba i konganda nokuhina omuzandona, tate ma kaṱa mena rokutja eye we mu suvera tjinene. Okutja arikana ndji ṱizira mba otja omukarere woye, nu omuzandona mu esa ma yende konganda.’
Josef arire tja munu kutja omarumbi we va runduruka. Owo kavavi nu kavindandi rukwao. Nambano indjo tu tare kutja Josef wa tjita tjike.
