JUSUFU eendaga kũmenya kana, ariũ acio akũrũ 10 a ithe, maatũire marĩ o oru na kwaga ũmũndũ. Kwoguo akiuga: ‘Mũrĩ athigani. Mũũkĩte gũthigana bũrũri witũ.’

Makiuga, ‘Aca, ithuĩ tũtirĩ athigani. Tũrĩ andũ ehokeku. Ithuĩ othe tũrĩ ariũ a ithe ũmwe. Twarĩ 12. No ũmwe ndarĩ ho, na ũrĩa mũnyinyi arĩ mũciĩ na baba.’

Jusufu agĩĩtua ndarametĩkia. Mũrũ wa ithe ũrĩa wetagwo Simeoni akĩigwo korokoro-inĩ, na akĩrekereria arĩa angĩ makuue irio mainũke. Ĩndĩ  akĩmera atĩrĩ: ‘Mũgĩcoka-rĩ, no mũhaka mũrehe mũriũ wa ithe wanyu ũrĩa mũnyinyi.’

Rĩrĩa maacokire mũciĩ kwao Kanaani-rĩ, ariũ acio makĩĩra ithe wao Jakubu maũndũ mothe marĩa mekĩkĩte. Jakubu akĩnyitwo nĩ kĩeha mũno. Akiuga mbu: ‘Jusufu ndarĩ ho, na rĩu Simeoni ndarĩ ho. Ndingĩmwĩtĩkĩria mũtware kĩhinga-nda gĩakwa Benjamini.’ Hĩndĩ ĩrĩa irio ciao ciambĩrĩirie gũthira-rĩ, Jakubu akĩmetĩkĩria matware Benjamini Misiri nĩ getha manengerũo irio ingĩ.

Rĩu-rĩ, Jusufu akĩona ariũ a ithe wao magĩũka. Nĩ aakenire mũno nĩkuona mũrũ wa nyina ũrĩa mũnyinyi Benjamini. Gũtirĩ o na ũmwe wao wamenyaga atĩ mũndũ ũyũ wa bata ũũ nĩ Jusufu. Rĩu Jusufu agĩgĩka kaũndũ ga kũgeria ariũ acio 10 a ithe wao.

Agĩgĩatha ndungata ciake ciyũrie makũnia mao mothe na irio. No atakũreka mamenye-rĩ, akiuga gĩkombe gĩake kĩa betha gĩĩkĩrũo thĩinĩ wa ikũnia rĩa Benjamini. Thutha wao kuuma kũu na matathiĩte handũ haraya-rĩ, Jusufu agĩgĩtũma ndungata ciake imaume thutha. Maakinyĩrũo-rĩ, ndungata ikĩĩmera atĩrĩ: ‘Nĩ kĩĩ gĩatũma mũiye gĩkombe kĩa betha kĩa mwathi witũ?’

Ariũ acio othe makiuga: ‘Tũtiyĩĩte gĩkombe gĩake. Mũngĩona gĩkombe kĩu na mũndũ ũmwe witũ-rĩ, reke mũndũ ũcio oragwo.’

Ndungata icio igĩgĩcaria makũniainĩ, gĩkombe gĩkĩoneka thĩinĩ wa ikũnia rĩa Benjamini, o ta ũrĩa ũrona haha mbica-inĩ. Ndungata igĩkiuga ũũ: ‘Inyuĩ wĩinũkĩrei, Benjamini no mũhaka tũthiĩ nake.’ Rĩu-rĩ, ariũ aya 10 megwĩka atĩa?

Othe magĩgĩcoka na Benjamini mũciĩ kwa Jusufu. Jusufu akĩĩra ariũ a ithe wao atĩrĩ: ‘Inyuothe inũkai kwanyu, ĩndĩ Benjamini no mũhaka atigwo gũkũ arĩ ta ngombo yakwa.’

Rĩu Juda akĩaria akiuga: ‘Ingĩinũka mũciĩ itarĩ na mwanake ũyũ-rĩ, baba no akue nĩũndũ nĩ amwendete mũno makĩria. Tondũ ũcio-rĩ, ndagũthaitha ũreke njikare gũkũ ta ngombo yaku, no ũreke mwanake ũyũ ainũke mũciĩ.’

Jusufu agĩkĩona ariũ a ithe nĩ magarũrũkĩte. Rĩu ti oru kana kwaga ũmũndũ. Tareke rĩu tuone ũrĩa Jusufu egwĩka.