Esimwititi 24: Josefa ta heteke vakuru vendi
JOSEFA ana hara kudiva nsene vakuru vendi 10 simpe ha va karera noudona nonyanya. Makura ta tanta asi: ‘One nondadi. Kuna wiza mu ya tare sirongo asi papi po apa pwa kara mapuku.’
Awo tava tanta asi: ‘Hawe, ose vantu wovawa. Ose natuvenye tu vana womugara gumwe. Ose kwa kere 12. Nye gumwe ga pira po. Munona po kweli kembo naguhyetu.’
Josefa ta lininkisa ngwendi kapi ana kuvahuguvara. Ta ninki mukurwendi gedina Simiyoni a kare modorongo, ano wokukwama ko va tware nondya nokuza kembo. Nye ta va tantere asi: ‘Apa ngomu ka tengura, mwa kona kukapitura mumbyeneni gomunona po.’
Apa va tengwire koKanani, tava ka tantera guhyawo Jakopo nayinye eyi ya horokere. Jakopo ta guwu unene. Age ta lili asi: ‘Josefa ga pira, ano ngesi Simiyoni nage ana pili. Kapi nani mu pulisira mu simbe munwange gomumati gomunona po Mbenyameni.’ Nye apa nondya dawo da tamekere kupwa, Jakopo ta va pulisire va simbe Mbenyameni koEgipite va ka simbe ko nondya dimwe hena.
Josefa makura ta mono vakuru vendi awo tava wiza. Age ana hafa unene mokumona mumbyendi Mbenyameni. Nye kwato gumwe gwawo ana diva asi mugara gomulyo ogu Josefa. Josefa makura ta rugana sininke simwe a heteke vakurugona vendi 10.
Ta ninki vakareli vendi va zwide nonsako dawo nadinye nonondya. Nye ga hana kuvadivisa ko, ta ninki hena nkinda zendi zokulikarera zosisiliveli va zi ture monsako zaMbenyameni. Apa va zire navenye awo vana piti kantando monzira, Josefa ta tumu vakareli vendi va va sikure. Apa vana va gwana, vakareli tava pura asi: ‘Yinke eyi muna vakere nkinda zosisiliveli zahekurwetu?’
Vakuru vendi navenye tava tanta asi: ‘Ose kapi tuna vaka nkinda zendi. Nsene nomu gwana nkinda ozo nankenye gumwe gwetu, ogo ga kona kumudipaga.’
Vakareli makura tava papara mononsako nadinye, makura tava gwana nkinda monsako zaMbenyameni, ngomu ono kuyimona apa. Vakareli tava tanta asi: ‘One wokukwama ko kuvhura tupu kuza, nye Mbenyameni ga kona kuza nose.’ Yisinke nava rugana ngesi vakurugona ava 10?
Navenye tava tengura naMbenyameni kembo lyaJosefa. Josefa ta tantere vakuru vendi asi: ‘Namuvenye kuvhura mu ze kembo, nye Mbenyameni ga kona kukara ngomupika gwange.’
Juda makura ta uyunga nokutanta asi: ‘Nsene ni za kembo na hana mumati, otate tava ka fa morwa awo kwa mu hara unene. Siga nge nye ame ni kare mupika goge, nye mumati a ze kembo.’
Josefa ta mono asi vakuru vendi vana lisinti. Awo kapi hena vana kara wovadona wonyanya. Tu tareni nye asi yisinke ga rugene Josefa opo.
Genesis 42:9-38; 43:1-34; 44:1-34.
Mapuro
- Morwasinke Josefa ana kurundira vakuru vendi asi nondadi?
- Morwasinke ana kupulisira Jakopo munwendi gonsiraura, Mbenyameni, a ze koEgipite?
- Nkinda zosiliveli zaJosefa, ngapi omu zina kara monsanko zaMbenyameni?
- Ngapi omu ana ligava Juda mokumangurura Mbenyameni?
- Ngapi omu va lisinta vakuru vaJosefa?
Mapuro gokugwederera ko
- Resa Genesis 42:9-38.
Nonkango daJosefa domwaGenesis 42:18, ngapi omu da kara ediworoko lyewa kowo va kara nositumbukiro mombunga zaJehova naina?
- Resa Genesis 43:1-34.
Nampili ngomu asi Rubeni yige ga kere mbeli, ngapi omu ya moneka asi Juda ga ya kere muuyungi po govakuru novamumbya vendi?
Ngapi omu ga hetekere Josefa vakuru vendi, ntani morwasinke?
- Resa Genesis 44:1-34.
Yinke ga rugene Josefa mokulihoreka mwene kovakuru vendi?
Ngapi omu vakuru vaJosefa va likidire asi va sigire mfudu ezi va kere nazo kwamumbyawo?
