JOSEFI alukufwaya ukwisiba kani balya abakwabo 10 bacili ne mitima iibipile kabili abakubule’nkumbu. Kalabila kuli bo ati: ‘Muli bacetesi. Mulisile mukuceto’kunaka kwa calo cesu.’

Kabalabila ati: ‘Koku. Tuli bantu ba cine. Fwebo tuli bana bankasi. Twali 12. Kabili umbi umukwasu taapo, kabili umwanice bantu ali na bawisifwe ku ŋanda.’

Josefi aba koti tasininkisyepo ukulabila kwabo. Akaka Simyoni umukwabo mwi kati, kabili alekako bambi abakupinte’fyakulya ukuya kwabo. Pano abeba’ti: ‘Ili mukabwela, mukese kuno ne mwanice wenu kabinda pamo na mwebo.’

Popele apo ili babwelele kwabo ku Kanani, abakwabo balimubulile Yakobi wisibo fyonse ifyacitikile. Yakobi abombomana makosa. Lomba aalukulila ati: ‘Josefi taapo, Simyoni naye taapo. Benjamini umwana wanji kabinda tamukayapo nakwe.’ Pano ili fyaya ili fisila ifyakulya, Yakobi amulekelako Benjamini ukuya nabo ku Ijipiti ukweba’ti bakapinteko ifyakulya na fimbi.

Pano Josefi ababona abakwabo balukwisa. Asangalala pa kubona Benjamini umwanice wakwe. Nacine, tapapo pali bo uwisi ati uyu mwalalume umucindeme ni Josefi. Josefi pano acita fimo ku kwesya balya abakwabo 10.

Kaababula abapyunjisi bakwe ukwisusye’fyakulya ku masaaka baali nayo. Ukwakubula ukubesibisya, kabili aeba ati babike ne nkomeci yakwe iye silifa kwi saaka lyakwe Benjamini. Pano ili baile lomba ninsi tabangenda ne musinso uutali, Josefi katuma abapyunjisi bakwe ukubalonda panuma. Popele pa kubasangana, abapyunjisi balabila kuli bo ati: ‘Kani pano nindo mwaibila inkomeci ye silifa iya basikulu?’

‘Tatwibile inkomeci,’ efi baasuka abakwabo bonse. ‘Uyo muntu uwa muli fwebo, uumwakubona ali ne nkomeci, ngaafwe.’

Nabo abapyunjisi kabatatika ukufwaya mu masaaka, popele ikomeci yalibwenekele mwi saaka lyakwe Benjamini, koti nififi wabona pa cikope apa. Eli abapyunjisi balabila ati: ‘Mwebo mwense koti mwaya, sombi Benjamini e wakuya na fwebo.’ Kani findo abakwabo 10 bakucita?

Bonse lukoso babwelela na Benjamini kuli Josefi ku ŋanda. Josefi ababula abakwabo ati: ‘Mwebo kamuya kwenu, pano Benjamini eo nakusyala nakwe ne kuba umusya wanji.’

Pano Juda eli angalabila ati: ‘Kani nebo naya ukwakubulo’kulukuli ne mwanice, batata bakafwa nipakuti balimutemenwe makosa. Pano ndukumukombeteleni ati njikale pa mupunda wakwe ne kuba umusya wenu, pano umwanice ngaaye ku musi.’

Lomba Josefi ababona abakwabo ati balyalukile. Tabalipo koti nififilya baali ababipile imitima kabili abakubule’nkumbu. Pano ngatubone ifi Josefi akucita.

Ifyakutaŋga 42:9-38; 43:1-34; 44:1-34.