ໂຍເຊບທົດລອງພວກອ້າຍຂອງຕົນ
ບົດ 24
ໂຍເຊບທົດລອງພວກອ້າຍຂອງຕົນ
ໂຍເຊບຢາກຮູ້ຖ້າຫາກວ່າພວກອ້າຍ 10 ຄົນຂອງຕົນຍັງເປັນຄົນມຸ່ງຮ້າຍແລະໄຮ້ຄວາມກະລຸນາຢູ່. ດັ່ງນັ້ນເຂົາຈຶ່ງກ່າວວ່າ: ‘ຫມູ່ເຈົ້າແມ່ນຄົນສອດແນມ. ຫມູ່ເຈົ້າມາເພື່ອຈະສືບເບິ່ງວ່າປະເທດຂອງເຮົາອ່ອນແອບ່ອນໃດ.’
ພວກເຂົາຕອບວ່າ: ‘ບໍ່ ບໍ່ແມ່ນຢ່າງນັ້ນ. ພວກຂ້າພະເຈົ້າເປັນຄົນສັດຊື່. ພວກຂ້າພະເຈົ້າເປັນພີ່ນ້ອງກັນທັງໝົດ. ພວກເຮົາເຄີຍມີອ້າຍນ້ອງ 12 ຄົນ. ແຕ່ນ້ອງຜູ້ນຶ່ງເສຍແລ້ວ ແລະນ້ອງຫຼ້າຢູ່ເຮືອນນຳພໍ່ຂອງພວກຂ້າພະເຈົ້າ.’
ໂຍເຊບເຮັດທ່າບໍ່ເຊື່ອພວກເຂົາ. ເຂົາຈຶ່ງກັກອ້າຍຊື່ຊີເມໂອນໄວ້ໃນຄຸກ ແລະໃຫ້ຄົນອື່ນນັ້ນເອົາອາຫານກັບບ້ານ. ແຕ່ບອກພວກເຂົາວ່າ: ‘ເມື່ອກັບມາ ຈົ່ງພານ້ອງຊາຍຫຼ້າມາກັບພວກເຈົ້າ.’
ເມື່ອກັບບ້ານເຖິງການາອານ ເຂົາກໍ່ເລົ່າເຫດການທຸກສິ່ງທີ່ໄດ້ເກີດຂຶ້ນໃຫ້ແກ່ພໍ່ຟັງ. ຍາໂຄບຮູ້ສຶກເສົ້າໃຈຫຼາຍ ຈຶ່ງຮ້ອງຂຶ້ນວ່າ: ‘ໂຍເຊບເສຍໄປແລ້ວແລະບັດນີ້ກໍ່ເສຍຊີເມໂອນໄປອີກ. ເຮົາຈະບໍ່ໃຫ້ພວກເຈົ້າເອົາລູກຫຼ້າເບນຍາມີນຂອງເຮົາໄປ.’ ແຕ່ເມື່ອອາຫານເກືອບຈະໝົດ ຍາໂຄບຍອມໃຫ້ເຂົາພາເບນຍາມີນໄປອີຢີບເພື່ອຈະໄດ້ອາຫານອີກ.
ເທື່ອນີ້ໂຍເຊບເຫັນພວກອ້າຍພວມມາ. ເຂົາດີໃຈຫຼາຍທີ່ໄດ້ເຫັນເບນຍາມີນນ້ອງຊາຍຂອງຕົນ. ແນ່ນອນ ບໍ່ມີໃຜຮູ້ວ່າບຸກຄົນສຳຄັນຜູ້ນີ້ຄືໂຍເຊບ. ຕອນນີ້ໂຍເຊບເຮັດບາງຢ່າງເພື່ອທົດລອງອ້າຍ 10 ຄົນຕ່າງແມ່ຂອງຕົນ.
ເຂົາໃຫ້ພວກຜູ້ຮັບໃຊ້ຈັດອາຫານໃສ່ກະໂລງຂອງພວກເຂົາຈົນເຕັມ. ແຕ່ເຂົາຍັງໄດ້ໃຫ້ເອົາຈອກເງິນພິເສດຂອງຕົນໃສ່ໄວ້ໃນກະໂລງຂອງເບນຍາມີນອີກດ້ວຍໂດຍບໍ່ໃຫ້ພວກເຂົາຮູ້. ຫຼັງຈາກທີ່ພວກເຂົາທຸກຄົນອອກເດີນທາງໄປໄດ້ບໍ່ໄກເທົ່າໃດ ໂຍເຊບສົ່ງຜູ້ຮັບໃຊ້ໃຫ້ໄປຕາມພວກເຂົາ. ຄັນໄປທັນພວກເຂົາແລ້ວ ຜູ້ຮັບໃຊ້ຈຶ່ງກ່າວວ່າ: ‘ເຫດໃດພວກເຈົ້າຈຶ່ງລັກເອົາຈອກເງິນຂອງນາຍເຮົາມາ?’
ອ້າຍທຸກຄົນບອກວ່າ: ‘ພວກຂ້າພະເຈົ້າບໍ່ໄດ້ລັກເອົາຈອກຂອງທ່ານເລີຍ’ ອ້າຍທຸກຄົນບອກວ່າ: ‘ຖ້າທ່ານພົບຈອກນັ້ນກັບຜູ້ໃດໃນພວກຂ້າພະເຈົ້າ ຂໍໃຫ້ຜູ້ນັ້ນຖືກປະຫານຊີວິດເຖີດ.’
ດັ່ງນັ້ນພວກຜູ້ຮັບໃຊ້ຄົ້ນເບິ່ງກະໂລງທັງໝົດ ແລະກໍ່ພົບຈອກໃນກະໂລງຂອງເບນຍາມີນ ຕາມທີ່ເຈົ້າເຫັນຢູ່ນະທີ່ນີ້. ພວກຜູ້ຮັບໃຊ້ເວົ້າວ່າ: ‘ພວກເຈົ້າທຸກຄົນໄປໄດ້ ແຕ່ເບນຍາມີນຕ້ອງມາກັບພວກເຮົາ.’ ຕອນນີ້ພວກອ້າຍ 10 ຄົນຕ່າງແມ່ຈະເຮັດຢ່າງໃດ?
ພວກເຂົາທັງໝົດພ້ອມເບນຍາມີນຈຶ່ງກັບໄປເຖິງເຮືອນຂອງໂຍເຊບ. ໂຍເຊບບອກພວກອ້າຍຂອງຕົນວ່າ: ‘ເຈົ້າທັງໝົດກັບບ້ານໄດ້ ແຕ່ເບນຍາມີນຈະຕ້ອງຢູ່ທີ່ນີ້ເປັນທາດຂອງເຮົາ.’
ຍູເດຈຶ່ງເວົ້າຂຶ້ນວ່າ: ‘ຖ້າຂ້າພະເຈົ້າກັບບ້ານປັດສະຈາກເດັກຫນຸ່ມນີ້ໄປດ້ວຍ ພໍ່ຂ້າພະເຈົ້າຈະຕາຍເປັນແນ່ເພາະທ່ານຮັກເຂົາຫຼາຍໆ. ຂໍໂປດກັກຕົວຂ້າພະເຈົ້າໄວ້ເປັນທາດຂອງທ່ານທີ່ນີ້ເຖີດ ແຕ່ຂໍໃຫ້ເດັກຊາຍນີ້ໄດ້ກັບເມືອບ້ານ.’
ໂຍເຊບສາມາດເຫັນໄດ້ວ່າພວກອ້າຍຂອງຕົນໄດ້ປ່ຽນ. ເຂົາບໍ່ແມ່ນເປັນຄົນມຸ່ງຮ້າຍແລະໄຮ້ຄວາມກະລຸນາອີກຕໍ່ໄປ. ໃຫ້ເຮົາກວດສອບຕໍ່ໄປວ່າຕອນນີ້ໂຍເຊບເຮັດປະການໃດ.
ຕົ້ນເດິມ 42:9-38; 43:1-34; 44:1-34
