TAJ José tuʼn tel tnikʼ qa o kubʼ kychʼixpuʼn kyibʼ ttzik mo mya bʼaʼn xjalqex. Tuʼntzunjo, xi tqʼmaʼn kye: «Noq ma che tzaje keʼyilte jatum bʼaʼn tuʼn kyoktze qʼojel tiʼj tnam lu».

‹Miʼn, nya ikjo›, che chi. ‹Bʼaʼn xjal qoʼye. Qkyaqile junx qmane ex kabʼlajtoq qbʼete at. Aju tal qitzʼine ma kyaj ten tukʼil qtate, atzun juntl naq o kubʼ naj›.

O tbʼincha José ik tzaʼn mintiʼ qʼuqle tkʼuʼj tiʼj kyyol. Tuʼntzunju, kyaj tjupuʼn Simeón aju ttzik, atzun kye txqantl xi tqʼoʼn ambʼil kye tuʼn t-xi kyiʼn wabʼj kyja. Atzun jlu xi tqʼamaʼn kye: ‹Aj kymeltzʼaje, iltiʼj tuʼn ttzaj kyiʼn kyitzʼine tuʼn tel nnikʼe tiʼj qa ax tok kyyole›.

Tejtzun kypon tukʼil Jacob aju kyman tuj txʼotxʼ Canaán, xi kytxʼolbʼaʼn tkyaqilju otaq bʼaj kyiʼj. Tzajxix tbʼis Jacob tuʼn jlu. Ex tqʼama: ‹Mitiʼtl José qxol›, ‹ax ikx mitiʼtl Simeón qxol. Miʼ txi nqʼoʼne ambʼil tuʼn t-xi kyiʼne nkʼwaʼle aju Benjamín›. Tejtzun chʼixtoq tkubʼ bʼaj kywa, xix tqʼoʼn Jacob ambʼil te Benjamín tuʼn t-xiʼ Egipto tuʼntzen ttzaj qʼoʼn mastl kywa.

Atze jaʼlo, ntlom, moqa ntil, José qeʼ ttzik tukʼe titzʼen chʼixtl kypon. Ntzalajxix tuʼnjo tzma nok tkiʼn twitz titzʼin, aju Benjamín tbʼi. Mitiʼx jun ma tzʼel tnikʼ qa aju xjal nimxix toklen atzun Joséjo. Kubʼ tbʼinchan José jun tiʼ tuʼntzun kyok ttzik tuʼn toj malbʼil.

Xi tqʼamaʼn José kye tmajen tuʼn tkux kynojsaʼn qeʼ kykostal terman tukʼil wabʼj. Ax ikx xi tqʼmaʼn José kye tuʼn tkux kyqʼoʼn tbʼanel tkʼabʼel toj tkostal Benjamín, mitiʼteq bʼiʼn jlu kyuʼn. Tejtzun kykubʼ terman toj bʼe, xi tsamaʼn José qeʼ tmajen tuʼn kyxi lepe kyiʼj. Tejtzen tkubʼ kyiʼj kyuʼn, xi kyqʼamaʼn majen kye: «¿Tiquʼn ma tzaj kyelqʼane tkʼabʼl npatrone aju saq pwaq ttxʼotxʼil?»

‹Mitiʼ qeye setz qelqʼaʼn tkʼabʼel›, che chi. «Bʼaʼn tuʼn tkyim alkye ma jatz knet kʼabʼl ttzi t-sak».

Tuʼntzunjo, kux kyjyoʼn majen tuj kykostal kykyaqil, ex jatz kanet toj tkostal Benjamín aju tkʼabʼel José, ikxix tzeʼnj nok tkaʼyine tzalu. Xitzen kyqʼmaʼn majen kye: ‹Kykyaqile bʼaʼn tuʼn kyxiʼye kyjaye, atzun te Benjamín iltiʼj tuʼn ttzaj qukʼile›. ¿Tiʼtzun kbʼantel kyuʼn ttzik jaʼle?

Kykyaqil e ajtz meltzʼaj tukʼe Benjamín atz tja José. Xitzen tqʼmaʼn José kye: ‹Bʼaʼn tuʼn kyaj meltzʼaje kyjaye, atzun te Benjamín iltiʼj tuʼn tkyaj te nmajene›.

Jawtzun yolen Judá, ex tma: ‹Kkyimel nmane qa mitiʼ qʼiʼn qʼa wuʼne aj npone, quʼn kʼujlaʼnxix tuʼn. Tuʼntzun jlu, in chin kubʼsane twitza tuʼn nkyaje te tmajene, atzun te kuʼxun lu tzaqpinxa›.

Nel tnikʼ José jaʼle qa o chʼixpuj kymod ttzik. Mitiʼtl mya bʼaʼn tkuʼx toj kyanmi. Qo xnaqʼtzal tiʼj jaʼlo tiʼ kbʼantel tuʼn José.