Tanojnots 24

José kinitak ikniuan ox kisentokayaj ijkon tanemiliayaj

JOSÉ kinekia kimatis ox majtakti ikniuan katkajok amo yolkualmej uan amo teiknelianij. Yejika kiniluij: ‘Namejuan nantapijpianij. Nantachiakoj kanika uelis nankalakiskej itech toaltepeuj’.

Yejuan kijtojkej: ‘Amo, tejuan amo titapijpianij. Tejuan titakamej tiyolmelaujkej. Nochin tiiknimej. Katkaj timajtaktiomomen. Sayoj ika, se tokniuj amo touan yetokok, uan tein xokoyot yetok kalijtik iuan topopaj’.

José kichiuak kemej eskia amo kinineltokiliaya. Tanauatij maj kitsakuakan ikniuj tein motokaytij Simeón, uan oksekin ikniuan kinkauak maj kiuikanij takual iminchan. Ompa, kiniluij: ‘Keman namokepaskej, xikualkuikan namokniuj tein xokoyot’.

Keman mokepkej iminchan, Canaán, ikniuan kiiluijkej imin popaj Jacob nochi tein mochiuak. Jacob moteltayokoltij. Kijtoj chikauak: ‘José amo touan yetok, uan yekintsin Simeón amo touan yetok. Amo nikauas maj kiuikakan noxokoyokoneuj, Benjamín’. Sayoj ika, keman kitamijtoyajya imin takual, Jacob monekik kikauas Benjamín maj kiuikanij Egipto, uan ijkon ueliskia kionkuiskiaj okachi takual.

Satepan José kinitak ejkotiualayaj ikniuan. Tel yolpakik keman kiitak ikniuj xokoyot, Benjamín. Sayoj ika, niosemej kimatkej ika nejon takat tein kipiaya se ueyi tanauatil, katka José. José kichiuak teisa uan ika kinitak majtakti ikniuan ox kisentokayaj tanemiliayaj kemej achto.

Kininauatij itakeualuan maj kininpexontilianij nochin imin koxtaluan ika takual. Sayoj ika, maski amo kiniluij keyej, no kininauatij maj kipankalakianij iplatajtatayiloni tein kitelkuia itech ikoxtal Benjamín. Satepan keman uejka moajsiajya, José kintitanik itakeualuan maj kinonikanajsinij. Keman kinikanajsitoj, kiniluijkej: ‘¿Keyej nankiichtekilijkej iplatajtatayiloni toteko?’

Nochin ikniuan tanankilijkej: ‘Amo tikichtektokej nionteyi. Komo tisemej nantechajxiliaj, xikmiktikan’.

Yejika takeualmej kitemojkej itech nochin koxtalmej, uan kiajsikej itech ikoxtal Benjamín, kemej tikita itech taixkopin. Takeualmej kiniluijkej: ‘Nochin uelis nayaskej, sayoj Benjamín moneki yas touan’. ¿Toni kichiuaskiaj majtakti itakpaikniuan?

Nochin mokepkej iuan Benjamín ichan José. Uan yej kiniluij ikniuan: ‘Nochin uelis nayaskej namochan, sayoj Benjamín moneki mokauas nikan kemej notekitikauj’.

Ompa Judá kijtoj: ‘Komo amo niajsi kalijtik iuan telpoch, momikilis nopopaj, porin kiteltasojta. Yejika, nimitstataujtia, xinechkaua nikan kemej nimotekitikauj, uan xikaua maj youi telpoch’.

José uelik kinitak ika ikniuan kipatakajya imin tanemilil. Amo katkajok teikamauiltianij. Maj tikitakan toni kichiuak José satepan.

Génesis 42:9-38; 43:1-34; 44:1-34.