ƐNEE Dwosefi kpondɛ kɛ ɔnwu ye kɛ ɔ mediema mgbanyinli 10 ne tɛde angomedi na bɛ ti tɛyɛ se a. Ɔti ɔhanle kɛ: ‘Bɛle busiama. Bɛra kɛ bɛbanleɛnlea yɛ maanle ye anu bɛanwu ɛleka mɔɔ yɛtɔ sinli la.’

Bɛbuale kɛ: ‘Kyɛkyɛ, ɔnle zɔhane. Nɔhalɛ a yɛka a. Yɛ muala yɛ ze ko. Ɛnee yɛle mediema 12. Na yɛ nuhua ko ɛnle ɛkɛ bieko, yɛɛ nuhua kazima ne wɔ yɛ ze anwo lɔ wɔ sua nu.’

Dwosefi anye fuu yɛle kɛ ɔnlie bɛ ɔnli la. Ɔhyele bɛ diema nrenya ne mɔɔ bɛfɛlɛ ye Semɛyɔn la ɔdole efiade, na ɔmanle bɛdabɛ mɔɔ bɛha la vale aleɛ hɔle sua nu. Noko ɔhanle ɔhilele bɛ kɛ: ‘Saa bɛsia bɛara a, ɛnee bɛva bɛ diema nrenya ekyi ne bɛrɛla.’

Bɛdwule sua nu wɔ Keena la, mediema ne mɔ hanle mɔɔ zile bɛ nwo zo la amuala hilele bɛ ze Gyekɔbo. Gyekɔbo arɛle bɔle kpole. Ɔzele kɛ: ‘Dwosefi ɛnle ɛkɛ bieko, na Semɛyɔn ɛvi me sa. Menrɛmaa bɛnrɛva Bɛngyaman, me ra ekyi ne bɛnrɛhɔ.’ Noko mɔɔ bɛ aleɛ ne ɛlɛwie la, ɛnee ɔwɔ kɛ Gyekɔbo maa bɛfa Bɛngyaman bɛkɔ Yigyibiti ala amaa bɛanyia aleɛ ne bie.

Dwosefi nwunle kɛ ɔ mediema ne mɔ ɛlɛba. Ɔ nye liele kpalɛ kɛ ɔnwunle ɔ diema kakula Bɛngyaman a. Nɔhalɛ nu, ɛnee bɛ biala ɛnze kɛ Dwosefi a le sonla kpole ɛhye a. Akee Dwosefi yɛle debie vale zɔle ɔ ze amra 10 ne nleanle.

Ɔmanle ye sonvolɛma ne vale aleɛ wulowulale bɛ ahodoku ne mɔ anu. Noko ɔmanle bɛvale ye dwɛtɛ fufule kɔpo ne bɛwulale Bɛngyaman kodoku ɛdeɛ ne anu, mɔɔ awie biala annwu ye a. Mɔɔ bɛ muala bɛvile suakpole ne azo bɛyele bɛ nwo na bɛhɔle moa ekyii la, Dwosefi zoanle ye sonvolɛma ne mɔ manle bɛdoale bɛ. Mɔɔ bɛhɔdole bɛ la, sonvolɛma ne mɔ bizale kɛ: ‘Duzu ati a bɛwua yɛ menle dwɛtɛ fufule kɔpo ne ɛ?’

Mediema ne mɔ amuala hanle kɛ: ‘Yɛtɛwuale ye kɔpo. Yɛ nuhua ko biala mɔɔ ɛkɛnwu kɔpo ne wɔ ye ɛkɛ ne la, maa bɛhu ye.’

Yemɔti sonvolɛma ne mɔ nleɛnleanle bɛ ahodoku ne mɔ anu, na bɛnwunle kɔpo ne wɔ Bɛngyaman kodoku ɛdeɛ ne anu, kɛmɔ ɛnwu ye wɔ ɛke la. Sonvolɛma ne zele kɛ: ‘Bɛdabɛ mɔɔ bɛha la kola sia kɔ, na Bɛngyaman mɔɔ ɔwɔ kɛ yɛ nee ye kɔ.’ Duzu a ɔ ze amra 10 ne bayɛ ye kɛkala a?

Bɛ muala bɛ nee Bɛngyaman ziale hɔle Dwosefi sua nu. Dwosefi hanle kɛ: ‘Bɛ muala bɛkola bɛkɔ sua nu, na Bɛngyaman ɛdeɛ ɔwɔ kɛ ɔtɛnla ɛke kɛ me akɛlɛ.’

Akee Dwuda dendɛle, na ɔzele kɛ: ‘Saa mesia mekɔ sua nu mɔɔ kakula ne ɛmboka nwo a, me ze bawu ɔluakɛ ɔkulo kakula ne somaa. Yemɔti mebodo mesɛlɛ wɔ, maa wɔ sonvolɛ, menga ɛke kɛ wɔ akɛlɛ, na maa kakula ne ɛhɔ sua nu.’

Dwosefi nwunle ye kɛ ɔ mediema ne mɔ ɛhakyi. Bɛnle angomedi nee abolɛ bieko. Maa yɛnlea mɔɔ akee Dwosefi yɛle la.