JOSEPH laek for savve sapos 10-fala brata bilong hem olketa still selfish and raf. So hem sei: ‘Iufala olketa spae. Iufala kam for faendaot abaotem kantri bilong mifala.’

Olketa sei: ‘Nomoa, mifala no spae. Mifala olketa honest man. Mifala evriwan brata. Mifala 12-fala bifor. Bat wanfala brata hem nomoa nao, and lastborn hem stap long hom witim dadi bilong mifala.’

Joseph hem sei hem no bilivim olketa. So hem keepim brata bilong olketa Simʹe·on long prison, and letem olketa narawan tekem kaikai and go bak long hom. Bat hem talem olketa: ‘Taem iufala kam bak, iufala mas tekem kam young brata bilong iufala.’

Taem olketa kasem hom long Caʹnaan, olketa brata talem evri samting wea happen long dadi bilong olketa Jacob. Jacob hem sorre fogud. Hem krae and sei: ‘Joseph hem nomoa, and distaem Simʹe·on tu nomoa. Mi bae no letem iufala tekem young son bilong mi Benjamin.’ Bat taem kaikai bilong olketa start for finis, Jacob mas letem olketa for tekem Benjamin long Egypt mekem olketa savve tekem moa kaikai.

Joseph lukim olketa brata bilong hem kam moa. Hem hapi tumas for lukim young brata bilong hem Benjamin. Bat no eniwan long olketa savve disfala important man hem Joseph. Then Joseph duim wanfala samting for testim 10-fala haf brata bilong hem.

Hem talem olketa servant bilong hem for fulimap olketa basket bilong olketa witim kaikai. And hem talem olketa for putim spesol silver kap bilong hem insaed long basket bilong Benjamin, bat olketa brata bilong hem no savve long diswan. Bihaen olketa lusim hem and gogo lelebet taem long road, Joseph sendem olketa servant bilong hem go long olketa. Taem olketa kasem olketa, olketa servant sei: ‘Why nao iufala stealim silver kap bilong masta bilong mifala?’

Evri brata hia sei: ‘Mifala no stealim kap bilong hem. Sapos iufala faendem kap long eniwan long mifala, iufala mas killim hem dae.’

So olketa servant lukluk insaed long evri basket, and faendem kap hia insaed long basket bilong Benjamin, olsem iu savve lukim long piksa. Olketa servant sei: ‘Iufala evriwan savve go, bat Benjamin mas kam witim mifala.’ Wanem nao 10-fala haf brata hia bae duim?

Evriwan go bak witim Benjamin long haos bilong Joseph. Joseph talem olketa brata bilong hem: ‘Iufala evriwan savve go bak long hom, bat Benjamin mas stap olsem slave bilong mi.’

Then Judah hem sei: ‘Sapos mi go bak long hom and boy hia no kam, dadi bilong mi bae dae bikos hem barava lovem hem. So plis, keepim mi olsem slave bilong iu, bat letem boy hia go hom.’

Joseph hem luksavve nao hao olketa brata hia change. Olketa no selfish and raf olsem bifor. Bae iumi lukim wanem nao Joseph duim.