24 yachachiy

Josep wawqisnin allinchakunku

JOSEQA 10 wawqisnin saqrallapunichus kasqankuta yachayta munarqa. Chayrayku nirqa: ‘Qamkuna qhawaraqkuna kankichik. Imaynachus kay llaqtay kasqanta watiqaqlla jamunkichik’, nispa.

‘Manapuni ñuqayku chayta ruwaykumanchu.’ nispa paykuna nirqanku. ‘Ñuqayku mana ima saqratapis ruwayta yachaykuchu. Tukuypis juk tatayuqlla kayku. Chunka iskayniyuq karqayku. Sullkʼaqa tataykuwan qhipakun, juknintaq chinkapun mana rikhurinchu’ nispa kutichirqanku.

Joseqa mana creeqman tukurqa. Chayrayku Simeonta wisqʼachirqa, wakintataq mikhunawan wasinkuman kachachkaspa nirqa: ‘Kutimuspaqa sullkʼa wawqiykichikta apamuwankichik’, nispa.

Canaanman kutiytawan tukuy imata tatanku Jacobman willarqanku. Jacobqa mayta llakikuspa nirqa: ‘Joseqa manaña ñuqanchikwanchu, Simeonpis manaña kaypichu. Mana sullkʼa wawayta apakapunaykichikta saqisaqchu’, nispa. Chaywanpis, mikhuna tukukapuchkaptin, Jacobqa mikhunata apamunankupaq, Benjamín Egiptoman rinanta saqirqa.

Joseqa juktawan wawqisnin kutimusqankuta rikurqa. Sullkʼa wawqisitunta Benjaminta rikuspa mayta kusikurqa. Manaraq pipis chay jatun runa José kasqanta yacharqachu. Kunanqa, José wawqisnin saqrallapunichus chayri allinchakusqankutachus yachanman karqa.

Kamachisninman kustalkunata mikhunawan juntʼachinankuta nirqa. Chantapis mana pipis yachachkaptin Benjaminpa kustalanman qullqi copanta churaykuchirqa. Ripusqankumantawan Joseqa kamachisninta qhipankuta kacharqa. Taripaytawan paykuna ninku: ‘¿Ima nispataq qamkuna patronniykup qullqi copanta suwamunkichik?, nispa.

Paykunataq kutichirqanku: ‘Ñuqaykuqa mana chayta ruwaykuchu. Mayqinpa makinpichus rikhurinqa chayqa, wañuchisqa kachun’, nispa.

Josep kamachisninqa tukuy kustalasta maskʼaspa, Benjaminpa kustalanpi copata tarirqanku. Josep kamachisninqa nirqanku: ‘Benjaminlla ñuqaykuwan qhipakunqa, qamkuna ripuyta atinkichik’, nispa. ¿Imatataq 10 wawqisnin ruwankuman karqa?

Tukuyninku Benjaminwan Joseman kutirqanku, José wawqinkunata nirqa: ‘Qamkunaqa ripuyta atinkichik, Benjaminqa kaypi qhipakunan tiyan’, nispa.

Judataq nirqa: ‘Mana sullkʼa wawqiykuwan ripusaqku chayqa, tatayqa wañupunqa, manchayta munakusqanrayku. Chayrayku pay qhipakunanmantaqa ñuqata qhipachiway, kay waynataq tataywan ripuchun’, nispa.

Joseqa wawqisnin manaña saqraschu kasqankuta rikurqa. Kunan imatatachus ruwasqanta qhawarina.

Génesis 42:9-38; 43:1-34; 44:1-34.