JOSEYMI yachayta munan 10 mayor wawqenkuna hinalla mana kuyapayakuq kasqankutapas otaq cambiarusqankutapas. Chaymi nirqa: ‘Wateqaqkunam kankichik, nacionniyku mana defiendesqa kasqanta qawaqmi hamurqankichik’ nispa.

Paykunañataqmi nirqaku: ‘Manam wateqaq runakunachu kaniku. Cheqap rimaq runakunam kaniku chunka iskayniyoq wawqekunam kaniku. Sullkaykum kachkan taytaykuwan hukninñataqmi chinkarun’ nispa.

Joseymi mana creeq tukurqa. Chaymi Simeon sutiyoq wawqenta carcelman churarachirqa, wakinnintañataqmi mana harkarqachu kawsayta apaspa llaqtankuta kutinankupaq. ‘Kutimuspaykichikmi ichaqa: Sullka wawqekichiktam pusamuwankichik’ nispam nirqa.

Canaan lawpi wasinman chayaspa taytanku Jacobman willakurqaku paykunata tukuy ima pasamusqanmanta. Jacobqa llumpayta llakikurqa: ‘Joseyqa manañam kanñachu, nitaq Simeonpas kaypiñachu nispam waqan. Manam warmay Benjamintaqa kachariymanchu qamkunawan rinanpaqqa’ nispa. Apamusqanku kawsay tukuruptinmi Jacobqa churin Benjaminta Egiptoman pusanankutapas dejarqa kawsaykunata rantimunankupaq.

Joseymi wawqenkuna kutimuchkaqta qawarurqa. Sullka kaq wawqen Benjaminta qawaykuspanmi kusikurqa. Ichaqa manayá mayqanninkupas yachankuchu kay ancha reqsisqa runaqa Josey kasqanta. Chaymi Joseyqa 10 wawqenkunata pruebarqa.

Serviqninkunata kamachin wawqenkunapa costalninman kawsayta huntachinanpaq. Hinaspa wawqenkuna mana yachasqallanpi serviqninkunata kamachirqa qollqe vasonta Benjaminpa costalninman churaykunankupaq. Manaraqpas karuta richkaptinku Joseyqa sirvientenkunata aviarurqa wawqenkunaman hayparunankupaq. Sirvientekuna hayparuspanku nirqaku: ‘¿Imanasqataq suwakamurqankichik señorniykupa qollqe vasontaqa?’ nispa.

‘Manam haykapipas chaynataqa ruraymankuchu,’ nispam llapallanku nirqaku. ‘Huk kaqniykupapi vasota tariruspaqa wañuchiychik’ nispa.

Chaymi dibujopi qawasqaykiman hina sirvientekuna paykunapa costalnikuta maskayta qallaykuspa Benjaminpa costalninpi vasota tarirurqaku. Hinaptinmi sirvientekuna nirqaku: ‘Wakinnikichikqa mana huchayoqmi kankichik Benjaminmi ichaqa ñoqaykuwan kutinqa’ nispa. ¿Imatamá 10 wawqenkunaqa ruranqaku?

Joseypa wasinmanmi Benjaminwan wawqenkunaqa kutirqaku. Chaymi Josey wawqenkunata nirqa: ‘Qamkunam wasikichikman hawkalla kutikunkichik, Benjaminmi ichaqa sirvienteyña kanqa’ nispa.

Chaymi Juda asuykuspa nirqa: ‘Mana warmayoq kutiruptiykuqa taytaykuqa wañurunqach llumpay kuyasqanrayku. Chaymi ruegakuyki, warmapa rantinpiyá sirvientekipaq ñoqaña quedasaq warmañataq kutichun wawqeykunawan’ nispa.

Joseyqa musyarunñam wawqenkuna cambiarusqanta. Manañam mana kuyapayakuqñachu kasqaku. Qawasunchikyá imatam Josey ruranqa.