YOOSEEFI tonnunku bayiruuddu roduuwisi wodani xaa geeshsha kaajjado ikkanna hoonge afara hasiˈri. Konni daafira togo yiinsa: ‘Kiˈne qotaanote. Dagginoonnihuno gobbanke laanfe laˈˈateeti.’

Roduuwisino, ‘Deeˈni, ninke diqotaanote,’ yitu. Qolteno, ‘Ninke ammanammoommo mannaati. Baalinke roduuwaho. Ninke 12 roduuwaati. Mittu rodiinke dino; maaˈnu rodiinke qaete anninkewa no’ yitu.

Yooseefi ammaninonsakkihu gede ikki. Rodoonsa Simiooni usuramanno gede asse, woloota kayinni gide haadhe qae higganno gede assi. Ikkollana kayinni, ‘Galagaltine higginanni wote maaˈniidi rodooˈne haadhinikki dagginoonte’ yiinsa.

Insano qaensa Kanaˈˈaani higguti ikkinore baala anninsa Yaaqoobira kultu. Yaaqoobino lowo geeshsha dadilli. ‘Yooseefi dino, xa kayinni Simioonino dino,’ yee lowo geeshsha wiˈli. ‘Hattono ikke maaˈniidi beettoˈya Biiniyaami kiˈne ledo disoyeemmo’ yii. Ikkollana sagalensa gooffara kaˈuta Yaaqoobi Biiniyaami insa ledo Gibitse haˈranno gedenna sagale ledde abbitanno gede soyi.

Yooseefi roduuwasi dagganna lai. Maaˈniidi rodoosi Biiniyaami laiti lowo geeshsha hagiidhi. Nugusa ikkinohu Yooseefi rodoonsa ikkinota insa giddonni mittuno diafino. Yooseefi amatenni xaaddannokkire tonnenka roduuwasi fonqolaraati.

Soqqamaanosi, duuchchunku dooniyyira gide wonshitanno gede assi. Ikkollana Yooseefi roduuwisi giddonni mittuno afikki addi xaasasi Biniyaami dooniyyi giddo worranni gede assi. Baalunku hadhe boodewa iillitu gedensaani, Yooseefi soqqaamaanosi hordoffanno gede soyi. Soqqamaanosi iillite, Yooseefi roduuwa, ‘Mootichchinke xaasa mayira moortini?’ yitu.

Yooseefi roduuwi, ‘Xaasasi dimoorroommo. Ninke giddo mittu manchi dooniyyira xaasa affiniro, hakko manchi reyoona’ yite qoltu.

Konni daafira soqqamaano, baalunku dooniyyi giddo xaasa hasse Biiniyaami dooniyyi giddo affu; kuneeti misilete aana lai. Soqqamaano Yooseefi roduuwa togo yitu: ‘Biiniyaami agurranna baalunku haˈra dandiitinanni; isi kayinni ninke ledo higanno.’ Biiniyaami ledo amatenni xaaddannokkiri kuri 10 roduuwi xa ma assitannokka?

Baalunku Biiniyaami ledo agurte Yooseefi qae higgu. Yooseefino, ‘Kiˈne qae haˈra dandiitinanni; Biiniyaami kayinni kowiichcho borojjichchoˈya ikkanno’ yiinsa.

Yihudano qoonqosi gotti asse, ‘Konne beetto agure qae higummoro, anniˈya iso lowo geeshsha baxanno daafira reyaanno. Konni daafira eeggatena, ani borojjichchokki ikkeenna beettu qae higona’ yii.

Yooseefi xa roduuwisi bashshonni woyyitinota afi. Roduuwisi xa kaajjaddanna bushuulle diˈˈikkitino. Hakkunni gedensaanni Yooseefi assinore hanni laˈno.