JOSÉ hakarak hatene nia maun naʼin-10 sei laran-aat ka lae. Tan neʼe nia hatete: ‘Imi espiaun. Imi mai atu buka-hatene kona-ba ami-nia nasaun fraku iha neʼebé.’

Sira hatete: ‘Lae, neʼe la loos. Ami ema laran-moos. Ami maun-alin hotu. Ami naʼin-12, maibé ida mate, no alin ikun hela iha uma hamutuk ho ami-nia aman.’

José finje katak nia la fiar. Nia hatama nia maun Simeão iha komarka, no husik sira seluk lori ai-han no fila ba uma. Maibé nia dehan ba sira: ‘Kuandu imi mai fali, imi tenke lori imi-nia alin ikun.’

Kuandu sira fila ba uma iha Kanaan, sira konta ba Jacob buat hotu neʼebé akontese. Jacob triste tebes. Nia tanis: ‘José mate tiha ona, no agora Simeão la iha tan. Haʼu sei la husik imi lori haʼu-nia oan-mane ikun Benjamim.’ Maibé kuandu sira-nia ai-han komesa hotu, Jacob tenke husik sira lori Benjamim ba Ejitu, hodi nuneʼe sira bele hetan ai-han tan.

Agora, José haree nia maun sira mai. Nia kontente tebes tanba haree nia alin Benjamim. Maibé, sira hotu la hatene katak ema-boot neʼe mak José. Agora, José halo buat ruma atu koko nia maun naʼin-10 neʼe.

Nia haruka nia atan sira enxe maun sira-nia saku ho ai-han. Maibé, hodi subar, nia mós haruka atu hatama nia kopu osan-mutin neʼebé espesiál iha Benjamim nia saku. Depois sira bá dook uitoan, José haruka atan neʼe tuir sira. Kuandu toʼo, atan neʼe dehan: ‘Tanbasá imi naʼok ami-nia naʼi nia kopu osan-mutin?’

Maun-alin sira hatete: ‘Ami la naʼok ninia kopu. Se imi hetan kopu neʼe iha ami neʼe ida, bele oho ema ida-neʼe.’

Nuneʼe, atan sira-neʼe buka iha saku hotu, no sira hetan kopu iha Benjamim nia saku, hanesan ita haree iha dezeñu neʼe. Atan sira dehan: ‘Imi seluk bele bá, maibé Benjamim tenke mai ho ami.’ Agora, saida mak maun naʼin-10 sei halo?

Sira hotu tuir Benjamim atu fila fali ba José nia uma. José hatete ba nia maun sira: ‘Imi hotu bele bá fali uma, maibé Benjamim tenke hela hamutuk ho haʼu nuʼudar haʼu-nia atan.’

Agora Judá mak koʼalia, nia dehan: ‘Se haʼu bá fali lahó labarik neʼe, haʼu-nia aman sei mate tanba nia hadomi tebes labarik neʼe. Nuneʼe favór ida, husik haʼu hela nuʼudar Ita-Boot nia atan, maibé husik labarik neʼe fila ba uma.’

José bele haree katak nia maun sira troka sira-nia an tiha ona. Sira la laran-aat tan. Mai ita haree saida mak José halo agora..