EKOT Yosep ajenun arai eroko ikenacan emameotor apodokinit ka asianut. Kotema atiar: ‘Iraasi yesi ikarotak, iponito aanyun akwap kwape ilarongongor.’

Kobalas ebe: ‘Mam, kirai da lukabeit. Kirai kere iinacan. Kirai kere 12. Konye onacekosi edoipet edauna ido ikosingorit ejai nepepe kapapakosi ore.’

Kijoseik Yosep bala mam iyunit nu inerasi kesi. Kidar onac lo anyaritai Simeon aidaris, kojalak luce ayangar inyamat ka abongor ore. Konye kolimok kesi ebe: ‘Ne ibongunatar, ibusakinit yesi ayangaun anacekus lodidi.’

Kebongosi ore Kanaan, kolimokis papakec Yakob akiro kere nuapotu otakanutu. Kitururu Yakob noi. Komony kobala ebe: ‘Yosep adaun, Simeon da adaun. Mam ikakoku Benyamin elosi nepepe kayes.’ Konye kedaunos inyamat kec, kocamak Yakob kes aiyangar Benyamin Misiri tetere kesi edumunete inyamat ice.

Koany kwana Yosep ikenacan epote. Iyalama ngesi noi aanyun onaceke lodidi Benyamin. Kabeit, amamei kakes yeni ajeni ebe etunganan lo apol lo arai Yosep. Kiswama Yosep icebore aigimoria ikenacan 10.

Kicorak ikengadak luka etogo ailelebanar ipukoi kec ka inyamat. Konye komam acamakin kes ajenun, abu ngesi koinak ekeikopo loitegelikina loka epuesa airupakinio opuko loka Benyamin. Akaulo na kesi anyoun ido koroko eapiete, kijuka Yosep ikengadak atupakin kesi. Kedolokis kesi, kobalasi ikengadak ebe: ‘Kanukinyo ikokounatar yesi aikopo naka ejakait kosi?’

Kobalasi inacan kere ebe: ‘Mam cut ikokounit aikopoke. Arai kidumutu aikopo kanejai idiopet kasio, koararai itunganan ngin.’

Kongicata ikengadak ipukoi kere, ido kodumakis aikopo toma opuko loka Benyamin, kwape iteio ijo kane. Kotemasi ikengadak ebe: ‘Ipedoete yesi ngul kere alosit, konye Benyamin ngesi ebongorete kasio.’ Inyo kwana iswamaunete inacan 10?

Apotu kobongosi nepepe ka Benyamin kiton togo loka Yosep. Kolimok Yosep ikenacan: ‘Ipedorete yesi kere alosit ore, konye Benyamin ngesi ibusakinit apaikin ne kwape ekabulesit.’

Kogeu Yuda ainer, kobala ebe: ‘Arai abongo ore omamei esapat, etwani papaka naraai emina ngesi noi. Aso kengaingait kidar eong ane kwape ekonibulesit, konye kojalak esapat obongo ore.’

Opedo do Yosep aanyun ebe ejulakinos ikenacan. Mam bobo kesi eraasi lumam epodokinitos ido komamei da asianut. Kaanyutu nu iswamai kwana Yosep.