Nganea 24: Yosefa U Linga Vhakomana Vhawe
Yosefa o ṱoḓa u ḓivha arali vhakomana vhawe vha 10 vha kha ḓi vha na tshiṱuhu. Ngauralo a ri: ‘Ni dziṱholi. No ḓa u wana hune shango ḽashu ḽi si vhe na maanḓa hone.’
Vha ri: ‘Hai, a ri dziṱholi. Ri vhanna vha fulufhedzeaho. Roṱhe ri vharathu na vhakomana. Ri 12. Fhedzi murathu muthihi ha tsheeho, nahone muṱuku u hayani na khotsi ashu.’
Yosefa a ḓiitisa unga ha vha tendi. A dzhenisa mukomana a vhidzwaho Simeoni dzhele, nahone a ita uri vhaṅwe vha dzhie zwiḽiwa vha ye hayani. Fhedzi a vha vhudza: ‘Musi ni tshi vhuya, ni fanela u ḓa na murathu wa vhoinwi muṱuku.’
Vha tshi vhuelela hayani Kanana, vhakomana vha vhudza khotsi avho Yakobo zwo iteaho. Yakobo a ṱungufhala zwihulu. A lila: ‘Yosefa ha tsheeho, zwino na Simeoni ha tsheeho. Thi nga ni tendeli ni tshi dzhia murwa wanga Benyamini.’ Fhedzi zwiḽiwa zwavho zwi tshi thoma u fhela, Yakobo a fanela u vha tendela u isa Benyamini Egipita uri vha kone u wana zwiḽiwa.
Yosefa a vhona vhakomana vhawe vha tshi khou ḓa. A takala zwihulu a tshi vhona murathu wawe Benyamini. Ho vha hu si na a ḓivhaho uri uyu munna muhulwane o vha e Yosefa. Yosefa a ita tshiṅwe tshithu tsha u linga vhakomana vhawe vha 10.
A ri vhaḓinḓa vhawe vha ḓadze masaga avho nga zwiḽiwa. Fhedzi a ita na uri tshinwelo tshawe tsha tsimbitseṱha tshi longwe sagani ḽa Benyamini, vha sa zwi ḓivhi. Nga murahu vhoṱhe vho no ṱuwa nahone vho no vha kulenyana nḓilani, Yosefa a ruma vhaḓinḓa vhawe vha vha tevhela. Musi vha tshi vha fara, vhaḓinḓa vha ri: ‘Ndi ngani no tswa tshinwelo tsha muṋe washu?’
Vha ri: ‘A ro ngo tswa tshinwelo tshawe. Arali na wana tshinwelo tshi na muṅwe washu, onoyo nga a vhulahwe.’
Vhaḓinda vha ṱoḓa masagani oṱhe, nahone vha wana tshinwelo sagani ḽa Benyamini, samusi ni tshi khou zwi vhona afha. Vhaḓinḓa vha ri: ‘Noṱhe ṱuwani, fhedzi Benyamini u fanela u ṱuwa na rine.’ Vhakomana vha 10 vho vha vha tshi ḓo ita mini?
Vhoṱhe vha humela na Benyamini nḓuni ya Yosefa. Yosefa a vhudza vhakomana vhawe: ‘Noṱhe ni nga ya hayani, fhedzi Benyamini u fanela u dzula fhano sa phuli yanga.’
Yuda a amba, a ri: ‘Arali nda vhuelela hayani ndi si na mutukana, khotsi anga u ḓo fa ngauri u a mu funesa. Nga khumbelo, nnzudze fhano sa phuli yau, fhedzi mutukana a ṱuwe.’
Yosefa a zwi vhona uri vhakomana vhawe vho shanduka. Vho vha vha sa tsha vha na tshiṱuhu. Kha ri wane uri Yosefa o ita mini.
Genesi 42:9-38; 43:1-34; 44:1-34.
![Vhakomana vha Yosefa vha a pomokwa](https://assetsnffrgf-a.akamaihd.net/assets/l/my/my_VE/24.jpg)
Mbudziso
- Ndi ngani Yosefa o pomoka vhakomana vhawe uri ndi dziṱholi?
- Ndi ngani Yakobo o tendela murwa wawe muṱuku, Benyamini, uri a ye Egipita?
- Tshinwelo tsha Yosefa tsha tsimbitseṱha tsho dzhena hani sagani ḽa Benyamini?
- Yuda o humbela uri hu itwe mini u itela uri Benyamini a vhofhololwe?
- Vhakomana vha Yosefa vho shanduka nga nḓila-ḓe?
Mbudziso dzo engedzeaho
- Vhalani Genesi 42:9-38.
Maipfi e Yosefa a a amba kha Genesi 42:18 ndi khumbudzo yavhuḓi nga nḓila-ḓe ṋamusi kha vha re na vhuḓifhinduleli ndanguloni ya Yehova? (Neh. 5:15; 2 Vha-Kor. 7:1, 2)
- Vhalani Genesi 43:1-34.
Naho Rubeni o vha e tanzhe, zwi vhonala hani uri Yuda o vha e muambeleli wa vharathu na vhakomana vhawe? (Gen. 43:3, 8, 9; 44:14, 18; 1 Koron. 5:2)
Yosefa o linga hani vhakomana vhawe, nahone ndi ngani? (Gen. 43:33, 34)
- Vhalani Genesi 44:1-34.
Yosefa o amba mini u itela u ḓidzumba uri vhakomana vhawe vha sa mu ḓivhe? (Gen. 44:5, 15; Lev. 19:26)
Vhakomana vha Yosefa vho sumbedza hani uri vivho ḽe vha vha vhe naḽo u thomani kha murathu wavho ḽo fhela? (Gen. 44:13, 33, 34)