KARUYAG hibaroan ni Jose kon an iya 10 nga kabugtoan salbahis pa gihapon. Salit hiya nagsiring: ‘Mga espiya kamo. Kinanhi kamo basi usisahon kon ano an kaluyahan han amon nasud.’

‘Diri kami mga espiya,’ siring nira. ‘Mag-opay kami nga tawo. Magburugto kami ngatanan. Dose kami hadto. Kondi waray na an usa, ngan an gimanghuri aadto ha balay upod ni tatay.’

Hi Jose kunohay waray tumuod ha ira. Iya iginpapriso an ira bugto nga hi Simeon, ngan gintugotan an iba nga magdara hin pagkaon ha ira pag-uli. Kondi nagsiring hiya ha ira: ‘Pagbalik niyo nganhi, kinahanglan iupod niyo an iyo gimanghuri nga bugto.’

Pag-abot nira ha Kanaan, ginsumatan nira an ira tatay nga hi Jakob han ngatanan nga nahitabo. Nasubo gud hi Jakob. Nagtatangis hiya ngan nagsiring, ‘Waray na hi Jose, ngan yana waray na liwat hi Simeon. Diri ko kamo tutugotan nga iupod an akon putó nga hi Benjamin.’ Kondi han tikaubos na an ira pagkaon, napiritan hi Jakob nga paupdon hi Benjamin ngadto ha Ehipto basi makakuha hin pagkaon.

Yana nakikita ni Jose nga tiarabot an iya kabugtoan. Malipayon gud hiya nga makita an iya manghod nga hi Benjamin. Syempre, diri hira maaram nga inin dungganon nga tawo amo hi Jose. Yana may-ada hiya ginbuhat basi sarihan an iya 10 nga kabugtoan.

Iya ginsugo an iya mga surugoon nga pun-on hin pagkaon an ira mga sako. Kondi diri hira maaram nga iginpabutang liwat niya ha sako ni Benjamin an iya kopa. Han binaya na hira ngan hurohirayo na, ginsugo ni Jose an iya mga surugoon nga lanaton hira. Han hin-abotan hira, an mga surugoon nagsiring: ‘Kay ano nga ginkawat niyo an kopa han amon agaron?’

‘Waray namon kawata an iya kopa,’ siring han magburugto. ‘Kon mabilngan niyo ha usa ha amon an kopa, pataya hiya.’

Salit gin-usisa han mga surugoon an ngatanan nga sako, ngan hin-agian nira an kopa ha sako ni Benjamin, sugad la han makikita mo ha retrato. An mga surugoon nagsiring: ‘An iba ha iyo mahimo na umuli, kondi hi Benjamin kinahanglan umupod ha amon.’ Ano an bubuhaton yana han 10 nga magburugto?

Binalik hira ngatanan upod hi Benjamin ngadto ha balay ni Jose. Ngan hiya nagsiring ha iya kabugtoan: ‘Makakauli na kamo ngatanan, kondi magpapabilin dinhi hi Benjamin sugad nga akon uripon.’

Kondi hi Juda nagsiring: ‘Kon umuli ako nga waray an bata, mamamatay hi tatay tungod kay hinigugma gud niya an bata. Salit nanginginyupo ako ha imo, ako na la an magpapabilin dinhi sugad nga imo uripon kondi paulia an bata.’

Nakita ni Jose nga nagbag-o na an iya kabugtoan. Diri na hira mga salbahis. Aton kitaon kon ano an iya sunod nga pagbubuhaton.