Tantara 24

Josefa Nitsapa Jery Rahalahiny

JOSEFA ti hahay asa rahalahiny folo aby in̈y mbala ratsy jery. Volan̈iny tamin-drô: ‘Anarô mpitsikilo. Hitsikilo taninay fo dianarô io.’

‘Zahay tsy hitsikilo taninarô’, hoy irô. ‘Zahay olo mafatoky. Mpirahalahy aby zahay jiaby io. Folo aroe amby zahay kibo araiky. Araiky aminay efa tsy iô, fa faralahy aminay tavela an-tran̈o an̈y miaraka amy babanay.’

Josefa nan̈ano sary tsy nan̈eky raha nambaran-drô. Nitanany tamy prizôn̈o Simeona rahalahiny, lan̈iany tavela nambelany nangala hanin̈y, baka iô nalefany nody. Nambarany tamin-drô fo: ‘Anarô koa mimpody atỳ, zandrinarô faralahy mila miaraka aminarô.’

Irô koa fa tafimpody ta Kanana, nitantarain-drô tamy baban-drô raha jiaby nahazo irô tan̈y. Jakoba tamy zen̈y nalahelo be. Izy nan̈adary. Volan̈iny: ‘Josefa efa tsy iô, Simeona koa fa tsy iô. Aha! Benjamina, zanako faralahy, tsy mahazo mandeha.’ Hanin̈in-drô koa fa nanampôno lany, Jakoba nan̈aomba Benjamina handeha ta Ejipta fo, beky irô mahazo hanin̈y.

Tsinjon’i Josefa rahalahiny aby io navy! Ravoravo be zay izy nahita Benjamina, zandriny. Irô tsisy nahay fa Josefa fo olo hajain̈y be io. Nan̈ano raha Josefa hitsapan̈a jerin-drô rahalahiny folo aby io.

Nirahiny finoan̈a hanin̈y sakan-drô jiaby. Baka iô, nirahiny napetraka tan̈aty sakan’i Benjamina kôpy volafotsinany, kanefa tsy hain-drô. Irô baka tiô nody. Koa fa refindrefiny, Josefa nan̈iraka ampiasany nan̈ian̈a irô. Izikoa irô fa takatra, volan̈in’ampiasa aby in̈y tamin-drô: ‘Nan̈ino ma kôpy volafotsin’ny sefonay nangalarinarô?’

Rahalahiny jiaby samy nivolan̈a ‘tsy nangala kôpy zen̈y’ aby. Volan̈in-drô: ‘Anao koa mahita raha zen̈y amin’araiky aminay, vonia izy.’

Ampiasa in̈y nisava sakan-drô tsiaraikiaraiky, ke tan̈aty sakan’i Benjamina nahitan̈a raha io. Ampiasa aby io nivolan̈a: ‘Anarô jiaby io mahazo mandeha, fa Benjamina tsy maintsy miaraka aminay.’ Ino amy zay raha nataon-drô folo lahy?

Irô jiaby nan̈araka Benjamina himpody tan-tran̈on’i Josefa tan̈y. Josefa nivolan̈a kara’ty tamy zôkiny aby io: ‘Anarô jiaby mahazo mody, fa Benjamina tsy maintsy midôko atỳ, hataoko andevonakahy.’

Tamy zen̈y Joda nivolan̈a: ‘Izikoa zaho mody ke tsy miaraka amy tsaiky io, hofoaty foeky daonko babako, fôtony tiany loatra izio. Ke zaho mba mangataka sefo, sitrany izy mody fa zaho ataova andevonao.’

Hitan’i Josefa amy zay fa niova zôkiny aby io. Irô fa tsy ratsy jery karaha taloha eky. Ino raha nataon’i Josefa baka tiô? Alô zahavatsika.

Genesisy 42:9-38; 43:1-34; 44:1-34.