YUSUFU akusaka kumanyilila naga acakulugwe 10 ŵala ali ciŵela kuŵa ŵangalwe. Ni akwasalila kuti: ‘Jemanja mli acimmagongo ŵam’yice kukulola cilambo cetu. M’yice kuti m’manyilile naga cilambo cetu nganicikola macili.’

Sambano jemanjajo akwanga kuti: ‘Iyayi, m’weji ngaŵa acimmagongo, m’weji tuli ŵandu ŵakulupicika. Tuli paulongo. Twapali ŵanace 12, nambo mpwetu jwine kwangali, soni jwamnandi mnope asigele kunyumba ni baba ŵetu.’

Yusufu akutenda yindu mpela ngakwakulupilila jemanjajo. Jwalakwe akum’wugalila m’nyumba ja ukayidi mkulugwe jwine lina lyakwe Simiyoni, ni akwakunda ŵanewo kupata yakulya ni kwawula nayo kumangwawo. Ni akwasalila kuti: ‘Pacimciyikagasoni, mkayice najo mpwenu jwamnandi mnopejo.’

Payice kumangwawo ku Kanani, jemanjajo akwasalila Baba ŵawo yosope yayitendekwe. Yakobo cimkamwile mnope canasa. Jwalakwejo akulila kuti: ‘Yusufu kwangali, sambanosoni Simiyoni kwangali. Une ngingunda kuti jemanja mumjigale mpwenu jwamnandiju Benjamini.’ Nambo yakulya yawo payatandite kumala, Yakobo ŵasosekwaga kwakunda kumjigala Benjamini kwawula najo ku Eguputo kuti akapate yakulya yine.

Sambano Yusufu akwawona acakulugwe ŵala ali mkwika. Jwalakwe ali jwakusangalala mnope kum’wona mpwakwe jwamnandi Benjamini. Nambope, pangali jwalijose jwa jemanjajo jwakumanyilila kuti mundu jwakucimbicikaju ali Yusufu. Sambano Yusufu akutenda kandu kane kakwalinga acakulugwe 10 ŵala.

Jwalakwe akwasalila ŵamasengo ŵakwe kuti agumbasye misaku ja jemanjajo ni yakulya. Soni akwasalila ŵamasengo ŵakwe kuti aŵice kapu jakwe jakusosekwa mnope mu msaku wa Benjamini, nambo mwangamanyilila jemanjajo. Nambo wosope ŵala ali apite, ali ajesile lutando lwamnono, Yusufu akwatuma ŵamasengo ŵakwe kwakuya. Pakwasimana, ŵamasengo ŵala akwawusya kuti: ‘Ana ligongo cici jemanja mjiŵile kapu ja ambuje ŵetu?’

Ni wosopewo akuŵeceta kuti: ‘M’weji nganitujiŵa kapu jawo.’ Naga ajisimane kapujo mwa jwalijose jwetuwe, jwele mundujo am’wulaje.’

Sambano ŵamasengo ŵala akuwungunyawungunya m’misaku josope, ni akujisimana kapujo mu msaku wa Benjamini, mpela mwakuyiwonela apanomu. Ŵamasengo ŵala akwasalila kuti: ‘Jemanja wosope komboleka kwawula kumangwawo, nambo Benjamini citumjigale.’ Ana sambano acakulugwe Yusufu 10 ŵala catende cici?

Wosope ŵala akuwujila yimpepe ni Benjamini kunyumba ja Yusufu. Yusufu akwasalila acakulugwe ŵala kuti: ‘Jemanja wosope komboleka kwawula kumangwawo, nambo Benjamini akusosekwa atameje akuno mpela kapolo jwangu.’

Sambano Yuda akuŵeceta kuti: ‘Naga nguwujila kumangwetu ndili jwangali kamcandaka, atati ŵangu caciwa ligongo akusamnonyela mnope. Ni conde asunje une akuno mpelaga kapolo jwawo, nambo amkunde mnyamatajo ajawuleje kumangwetu.’

Yusufu akwawona kuti acakulugwe ŵala asindile. Nganaŵasoni ŵandu ŵangalwe ni ŵangali canasa. Kwende sambano tulole yakutenda Yusufu kaneko.