Jo Ot-ti Gucito Ejipt
Ododo 25
Jo Ot-ti Gucito Ejipt
YUCEPU onongo dong pe romo medde ki diyo cwinye. En owaco ki luticce ducu me a woko ki i ot. I kare ma en ki omegine gudong ken-gi, Yucepu ocako koko. Watwero tamo kit ma omegine guuro kwede, pien gin onongo pe gingeyo pingo en tye ka koko. I ngeye en owaco ni: ‘An a Yucepu. Wora pud tye kwo?’
Omegine gubedo ki twon ur ma omiyo onongo dong pe gitwero lok. Lworo omakogi. Ento Yucepu owaco ni: ‘Wutim ber wunyik cok.’ I kare ma gutimo meno, en owaco ni: ‘An ominwu Yucepu, ma wucato i Ejipt-pi.’
Yucepu omedde ki lok kwedgi ki kica ni: ‘Pe cwinywu owang pien wucata kany. Lubanga aye ocwala Ejipt me laro kwo pa dano. Parao oketa me loyo lobo-ni ducu. Pi meno kombeddi dong wucit oyot bot wora wek wutitte lok man. Dok wutitte wek en obin obed kany.’
Cutcut i nge meno Yucepu okwako kor omegine kun doto lemgi. Tekki Parao winyo ni omegi Yucepu gubino, en owacce ni: ‘Wek guwany gadigadi gucit guom won-gi ki jo me odigi ci gudwog kany. Abimiyogi ngom maber loyo ki i Ejipt.’
Gin gutimo meno. Kany itwero neno Yucepu tye ka rwatte ki wonne i kare ma en obino Ejipt kacel ki jo ode.
Jo ot pa Yakobo onongo dong gudoko pol tutwal. Gin ducu onongo dong gitye jo 70 i kare ma Yakobo ocito Ejipt, ka kikwano Yakobo, lutinone ki likwayone. Ento mon bene onongo gitye, dok nen calo lutic mapol bene onongo gitye. Jo-ni ducu gunongo kabedo i Ejipt. Kilwongogi ni jo Icrael, pien Lubanga oloko nying Yakobo odoko Icrael. Kit ma wabineno kwede lacen, jo Icrael gudoko jo ma pigi tek tutwal bot Lubanga.
